搶客黨起尾注 攻陷海洋公園

「十月哈囉喂」有排至到，何解海洋公園門口咁猛鬼？望真啲，佢哋唔係鬼，而係搶客黨，明搶海洋公園遊客，仲犀利過猛鬼吖！

嗱嗱嗱！有遊客啱啱落車就畀自稱旅行社職員嘅人纏住，以每張門票平三十蚊嘅筍價兜售，成交後即被安排混入內地旅行團進場。嘩！搶客黨明目張膽喺正海洋公園門口搵食，咁即係擺明食夾棍啫。

其實，何止海洋公園有搶客黨，有「艇仔」話，連迪士尼樂園門票都有黃牛飛添吖。真係講都冇人信，本報記者喺海洋公園直擊發現，淨係中午兩粒鐘咋，至少五百人用同樣方式入閘，問你服未。

據講，黃牛飛係旅行社以團體票形式向海洋公園大量購入，買得愈多，折扣愈大。以平均每張飛大約賺五十蚊計，淨係暑假兩個月，最少可以賺一百五十萬，仲好過特首呢份工，幾和味。

叮！咁搞法仲成世界嘅！海洋公園唔止係本港旅遊業嘅生招牌，直頭係香港嘅標誌，搶客黨居然喺度打橫行，香港乜形象都冇晒啦。正如旅遊界立法會議員話齋，「香港係文明有規範嘅社會，到處有黃牛黨，對大都會形象大打折扣。」

冇錯嘞，仲記得舊時海洋公園宣傳片「去玩，去癲，嚟Ocean Park」隻歌仔嗎？當局闊佬懶理，變相縱容主題樂園淪陷，搶客黨「去搶，去呃，嚟Ocean Park」，賺到盆滿缽滿，係咪好搞笑呢？

不過市民就笑唔出咯。旅遊業係本港經濟支柱之一，近年涉及黑店劏客同導遊強迫購物嘅醜聞不斷，旅遊業形象插水。海洋公園遠近馳名，開園三十幾年接待遊客過億，如果形象受到破壞，遊客望而卻步，旅遊業呢條經濟支柱隨時冧得，咁就大鑊喇。

歸根究柢，海洋公園淪為搶客黨天堂，皆因售票機制同相關法例有甩漏。同迪士尼樂園比較，海洋公園團體票折扣更「鬆手」，吸引大批搶客黨食大茶飯。加上現行法例對炒賣黃牛飛嘅監管過於寬鬆，就算告得入，只係罰款兩千蚊咁大把，毫無阻嚇作用，搶客黨驚都未驚過。

海洋公園淪陷，港府疏忽職守罪無可恕。計太一叮話齋，如果當局繼續袖手旁觀，唔盡快堵塞漏洞，撥亂反正，遊客敬而遠之，海洋公園水盡鵝飛，香港旅遊業遲早玩完嘅咋。叮！