沙排女將開財路

出位性感廣告任影唔嬲、英國沙排雙妹嘜夠「股」惑！倫敦近排唔止騷亂，仲打緊2012年奧運測試賽，東道主組合鄧佩妮（Zara Dampney）同穆蓮（Shauna Mullin）連日嚟搶晒風頭，佢哋打波好勁？No啦！係因為兩個女將喺條比堅尼三角褲屁股位置，印咗個二維碼（Quick Response Code）廣告，等班球迷同攝記可以「光明正大」對住個靚股狂影相都唔怕畀人話變態！

倫奧門票開售咗一段時間，最搶手當然係男子百米飛人大戰，跟住呢？竟然係沙灘排球……女子組喎！無他嘅，班女個個Bra top+比堅尼褲仔，梗係睇到人噴血啦！英國博彩公司Betfair於是靈機一觸，喺Zara、Shauna屁股賣廣告，夠晒創意。該公司發言人Andy好滿意效果：「一係唔做，要做就去得盡啲！我哋要保證體育迷睇完個Ad之後一定記得，你諗吓，仲有邊度比呢個位置（屁股）做廣告夠噱頭先！」

引人注視懶理批評

廣告一出，引起唔少爭議，有網友認為班沙排女將開多咗條財路，亦有人話太過火、太離譜！畢竟大家睇嘅係比賽唔係屁股。不過世界排名26位嘅Zara同Shauna一啲都唔Mind，佢哋異口同聲表示：「沙排喺美國、德國、巴西Hit到爆，反而喺英國冇人重視，大家只知道Sexy，根本唔當佢係體育運動。既然廣告可以令更多人關注同認識呢個項目，點解唔做喎？」

Betfair二維碼廣告確實出位，但呢個如意算盤喺倫奧就打唔響，事關據國際奧委會規定，除服裝品牌商標，運動員啲衫褲都唔可以賣任何廣告，唔知到時有冇人走到法律罅呢？

穆蓮‧Shauna Mullin

出生日期：84年9月11日

身高/體重：1米78/70公斤

出生地點：南非　　目前世界排名：26

＊03年曾代表英國（室內）排球隊參加世界大學生運動會，至06年轉打沙灘排球，09年開始夥拍鄧佩妮參加巡迴賽。

鄧佩妮‧Zara Dampney

出生日期：86年6月10日

身高/體重：1米78/65公斤

出生地點：英國　　目前世界排名：26

＊學生時代已鍾情排球運動，02年起代表英國參加室內及沙排賽事，08年夥拍另一拍檔奪得沙灘英國全國賽冠軍。