滙豐裁員敲警鐘 環球經濟有暗湧

俗語話，獅子搏兔，亦用全力。估唔到獅子銀行炒人一樣咁狠，一出手就話裁減香港三千名員工，打工仔變成任人宰割嘅小白兔，你話幾無奈吖。

滙豐銀行係全港最大僱主之一，失驚無神推出歷來最大規模嘅裁員行動，震撼程度好似勞工市場「911」，都咪話唔得人驚。唔怪得勞工團體紛紛到滙豐總行抗議，仲攞總行門外兩隻銅獅開刀添。有人用畫上金錢符號嘅紙條遮閉獅子對眼，有人就將打爛咗嘅飯碗碎片塞入獅子個口。

嗱，工會代表係咁講嘅，滙豐喺香港賺取超高利潤，但冇盡社會責任，裁員唔止影響員工生計，更擔心掀起新一浪裁員潮，要求滙豐撤回裁員計劃。

滙豐銀行在商言商，梗係覺得工會嘅要求係獅子開大口啦，不過咁噃，勞工界嘅擔憂唔係冇道理o架。香港經濟現時係外強中乾，好睇唔好食，連金融雄獅都話撐唔住要大幅瘦身，其他中小企仲唔有樣學樣咩？退一步講，就算其他企業唔跟風，打工仔唔使食無情雞，被人乘機壓價凍薪減人工，都夠閉翳啦。

最怕嘅仲係滙豐突然裁員瘦身，可能係經濟暴風雨前夕嘅不祥之兆。大家有眼睇o架啦，歐美經濟疲弱不堪，一時話歐債危機深不見底，一時傳美國可能陷入雙底衰退，滙豐會唔會係預早聞到燶味，所以趁早減磅避險o架？香港正飽受通脹肆虐，萬一經濟逆轉，失業率掉頭回升，港人喺雙重夾擊下咪好大鑊？

經濟危機四伏，前景滿布陰霾，港府高官又有乜反應呢？勞工及福利局局長張建宗就話嘞，對勞工市場嚟講，滙豐裁員唔係好消息，但相信只屬個別事件，並非市場趨勢咁話喎。

太一叮聽完張局長咁講，就更加放心唔落嘞。首先，滙豐員工慘遭大開殺戒，當然唔係好消息啦，唔通開香檳慶祝咩，勞工官僚講廢話，工作能力實在令人擔憂。第二咯喎，張局長對事件輕描淡寫，擺出一副老神在在嘅姿態，咁就弊弊弊！你知啦，每次環球金融及經濟刮大風暴，港府例牌後知後覺，事前班高官又係好似張局長咁老定o架，結果大難臨頭時，次次都搞到手足無措，抗災無力。

所以話啫，港府都係靠唔住嘞，面對環球經濟暗湧，打工仔都係自求多福啦，叮！