勞工組織民望升 搞事政棍遭唾棄

曾蔭權一句「民望於我如浮雲」，就翹埋雙手等收工，梗係啦，夕陽政府時日無多，得過且過，睬你都傻！

民意對賴皮政府嘅監督力量輕如鴻毛，但係對政黨就唔同嘞，事關選票係佢哋嘅生命。嗱，港大民意研究計劃公布最新民調，大家估吓，民望排名最高嘅政團係邊幾個？無巧不成話，三甲位置清一色係勞工組織，分別係工聯會、職工盟同街工，今次都算工字有出頭咯。

有人歡喜有人愁，評分下跌嘅政團有七個，咁啱得咁蹺，跌幅最大嘅頭三位不約而同都係泛民政團喎，分別係公民黨、支聯會同民主黨嘞。調查機構分析，三個政團民望下滑，可能同外傭居港權爭議、司徒華效應減退同民主黨前總幹事陳家偉涉嫌嫖妓有關。至於社民連，例牌包尾，評分仲跌至成立以來新低添。

嗱嗱嗱，勞工組織民望拍住上，其他政團評分齊齊跌，對於呢個民調結果，太一叮認為絕對唔係巧合咁簡單，完全係有迹可尋。先講工會受歡迎呢家嘢，鬼咩，香港經濟外強中乾，隱憂重重，在職貧窮問題日益加劇，打工仔有汗出、冇糧出嘅勞工悲歌唱極都有，喺咁嘅情況下，打正旗號幫勞工爭取權益嘅工會團體民望有乜可能唔水漲船高吖？

民調如鏡，勞工組織做實事幫工友，所以民望領先。唔使問阿桂，嗰啲民望評分插水嘅政團，死因梗係成日無事生非搞風搞雨，所以被市民唾棄啦。嗱，搞政治搞到上一樓一，講法治講到被人質疑濫用司法程序，呢啲行為固之然係政壇垃圾，而嗰啲只識喺議會掟蕉、煽動暴力抗爭嘅行徑，好似紅衞兵上身咁，一樣係唔要得o架咋。市民眼睛係雪亮嘅，一個民調結果就睇得清清楚楚嘞。

即係咁，市民用選票將政黨中人送入立法會，係希望佢哋監督政府，而唔係想睇佢哋喺議事堂點樣做騷，更加唔希望見到班政客成日吵吵鬧鬧，搞到香港亂七八糟，永無寧日！

所以話啫，今次民調真係好值得從政者借鑑o架，事關就算閣下充其量只係一條政棍，但都唔想被選民唾棄，喺直選戰場上跌到一仆一碌o架，叮！