紙老虎冇心冇力 勞審處助長欠薪

潮流興講垃圾。政務司司長唐英年形容批評聲音係垃圾，網民鬧番佢垃圾不如，究竟點為之真正垃圾呢？大家想搵答案，唔使去到將軍澳堆填區咁遠o架，去油麻地就得嘞。

點解太一叮咁講呢？因為勞資審裁處就喺嗰度，呢個本意為市民解決勞資糾紛嘅司法機構，就快淪為一件失去實際用途嘅超級大廢物，對研究何謂垃圾極具參考價值。唔明嘅話，聽吓地盤工友點講就一清二楚嘞。

係人都知，建築行業一直係欠薪重災區，理論上勞審處應該係佢哋嘅救星。嗱，尋日建造業職工總會登門造訪，但唔係送禮謝恩喎，而係踩上門請願，抗議勞審處處理欠薪個案冇心又冇力，只係一隻虛有其表嘅紙老虎！

法律訂明欠薪係違法，堂堂一個勞審處竟然係紙老虎，唔去處罰違法者？工友踢爆，每次舉報僱主欠薪，勞工處同勞審處唔知係為咗慳水慳力吖，定係想幫無良僱主慳錢，餐餐都傾向調解了事，逼誘工友退讓接受折扣欠薪。以過去一年為例，工會八成求助個案最終都係被迫庭外和解，工友一般只能夠討回欠薪嘅一半金額，勞審處恍如變身無良僱主剝削工人半價支薪嘅游說集團。

好嘞，就算工友突然行運，竟然遇到一個半個稍為冇咁懶散嘅勞審處官僚，但係要攞番晒啲血汗薪水一樣難過中六合彩。就算僱主被勞審處判令要支付欠薪，一樣拖足幾個月都唔跟從，紙老虎幫工人討薪只係虎頭蛇尾，判令有如一紙空文，工友有汗出、無糧出，生活大受影響。

最離譜嘅係，原來港府上年十月修例打擊欠薪以嚟，只有一名僱主被成功檢控，一樣無按判令支付拖欠薪金，你估最後法庭施予乜嘢懲處呀？判罰一百小時社會服務令！原來欠薪嘅結果只係做吓社會服務，當體力勞動鍛煉體魄。咁搞法，阿貓阿狗周身無蚊都夠膽開舖請工人啦！

工會講得啱o架，勞審處對欠薪僱主判罰過輕，阻嚇力不足，係咪等如助長無良僱主欠薪嘅大幫兇先？勞審處處理欠薪冇心冇力，又係咪已經變成可有可無嘅垃圾呢？

計太一叮話齋，勞審處何止係紙老虎，紙老虎睇得唔打得，都叫做嚇得吓人吖，但係勞審處唔打得又唔睇得，無良僱主直頭當佢透明。欠薪欠到肆無忌憚，再咁落去，勞審處遲早變成垃圾掟落堆填區，叮！