屋署驗樓求其 塌樓實屬人禍

殘舊危樓甩皮甩骨，應該如何處理？即刻要求業主維修吖，定係由得佢繼續搖搖欲墜呢？

正常人一定會答，危樓倒塌隨時死得人多，梗係要十萬火急搶修啦。不過，屋宇署官員可能就唔係正常人嘞，事關佢哋未必會咁諗，如果唔係，上年初就唔會發生土瓜灣馬頭圍道塌樓死人慘劇啦。

死因庭完成塌樓慘劇研訊，裁定四名死者死於意外，理論上冇人需要負上刑事責任。但正如裁判官話齋，屋宇署測量師「做嘢求其、交行貨」，大業主未有盡力搵認可人士負責工程，承辦商又未能察覺大廈結構嘅危險性，三者皆有過失。其實，塌樓前兩個月有屋宇署測量師檢查過，照計不難驗出樓宇結構出現問題，哈，偏偏屋宇署官僚就係發雞盲，目測結論竟然認為樓宇冇即時危險，只係向業主發出勸喻信。

裁判官就話嘞，屋宇署官僚只係流水作業式巡查樓宇，驗樓工作求其，建議署方以後不如直接向危樓業主發修葺令好過。正如病人驗出末期癌症，都唔會拖足兩個月先至治療啦。

裁決一出，外界嘩然。之不過咁，對於塌樓遇難者死於意外呢個裁決，太一叮都唔覺得意外，事關已經見怪不怪咯。呢，康文署驗樹馬虎求其，導致赤柱冧樹壓死一名女大學生，又係被裁定死於意外；灣仔食肆巨型招牌墮下砸死人，法庭又係話意外。總之，市民枉死次次都係意外，懶散官僚就次次都甩身，關人個關。

事實好明顯，天災皆因人禍起。如果壞樹一早被驗出病入膏肓加以護理，女大學生點會香消玉殞？如果溶溶爛爛吊吊揈嘅危險招牌一早被清拆，又點會成為殺人兇手？如果屋宇署工作態度嚴謹，驗樓唔係咁求其，又點會發生冧樓死人慘劇？仲有吖，如果唔係官僚部門餐餐都輕易甩身，從來冇人被追究問責，從來唔識吸取教訓，更加唔會有咁多悲劇發生！

冇錯，香港淪為危城，奪命陷阱無處不在，防不勝防，死因就係官僚部門做嘢求其，乜都例行公事交行貨，所以咪搞到危機四伏囉。各位市民，求人不如求己，行騎樓底記住戴鋼盔呀，叮！