倒曾不分老嫩 衰在施政混亂

曾蔭權真係冇講錯，視民望如浮雲，所以佢嘅民望就好似一舊大烏雲咁，愈沉愈低。

嗱，港大最新民調顯示，曾蔭權嘅民望評分又跌嘞，支持度繼續肥佬，只得四十七點九分，下跌零點四分；支持率更加慘不忍睹，再跌一個百分點至剩番兩成三。調查分析指，「八十後」年輕人最反對煲呔曾出任特首，反對率達七成一，即係每十個後生仔女，就有超過七個想佢落台。

對於呢個調查結果，太一叮一啲都唔覺得意外，事關夕陽政府等收工，翹埋雙手唔做嘢，煲呔曾民望低殘，跌跌不休，根本係正常過正常啦。唔信呀？又睇吓另一項調查吖。工聯會訪問咗五百幾位老人家，八成人批評港府對長者支援不足，安老政策交白卷！

老人家鬧得啱o架，港府成日整色整水話敬老，其實樣樣措施都係蜻蜓點水，虛應民意。例如，津貼長者睇醫生嘅醫療券，開頭一年先至得二百五十蚊，到喉唔到肺，就算後來加到五百蚊，都係聊勝於無嘅啫。又例如，長者搭港鐵有兩蚊任搭優惠，但限制多多，連星期日都話唔得，你話作為港鐵大股東嘅港府係咪不知敬老為何物吖？

話時話，煲呔曾已經淪為過街老鼠，「八十後」唔妥佢，老人家唔鍾意佢，日捱夜捱都買唔到樓嘅無殼蝸牛更加想趕走佢。煲呔曾做緊施政報告諮詢騷，咪又係整色整水，市民早就凝聚共識復建居屋，係佢食古不化阻住地球轉，卒之咪搞到住屋問題一塌糊塗囉。由於樓價高企，籠屋、棺材房呎租仲貴過豪宅，無殼蝸牛唔(慶)就假。

仲有呀，煲呔曾懶理民生，政治更加理唔掂，管治風波無日無之，好似患咗老人風濕症咁，三日唔埋就發作一次。呢，最近嘅警權風波就鬧得滿城風雨。其實，錯就要認，打就企定，警方執法出問題，咪躀一鋪認咗佢囉，點知煲呔曾及曾偉雄仲一味死撐，愈描愈黑。港府自己攞嚟衰都算啦，最慘搞到香港家嘈屋閉，冇時安寧。

一句講晒，倒曾不分老嫩，衰在施政混亂。煲呔曾民望繼續插水，睇嚟已經係無法改變嘅事實，不過佢咪以為就快收工就得過且過呀，因住隨時連最後十個月都捱唔到，搞到要腳痛就好笑喇，叮！