屋宇署繼續求其 清拆令形同作廢

跛腳鴨政府最懶最弱雞嘅部門非屋宇署莫屬。清拆都市炸彈關乎人命，佢哋居然懶得就懶，條條揈唔做嘢，簡直係攞市民生命較飛。

呢，土瓜灣馬頭圍道四屍五命大火發生咗兩個幾月，出事大廈劏房問題嚴重，部分逃生通道被封，走火困難係造成慘劇主因之一。屋宇署事後向大廈最少八個單位業主發出清拆令，限定上月三十號前動工清拆單位內違規建築，最遲今日完成工程。

本報記者尋日去現場了解情況，唔睇猶自可，一睇嚇一跳，多個已被釘契嘅單位依然原封不動，莫講話完成工程，直頭連工都未開。有立法會議員狠批屋宇署冇做嘢：「發生咁嚴重嘅大火，冇理由仲畀兩個月時間佢去拆違規建築！」業主當清拆令係廢紙、當法例透明，你話屋宇署係咪弱雞夾廢柴吖，叮！

講開又講，業主當屋宇署冇到，其實係有原因o架。屋宇署署長區載佳其身不正，自己都捲入僭建風暴，對法官嘅建議陽奉陰違，意見接受，做法照舊，業主咪有樣學樣囉。

仲記得舊年年初馬頭圍道冧樓慘劇嗎？死因裁判官前排狠批屋宇署人員驗樓求其「交行貨」，仲提出多項建議，包括「行孖咇」驗樓，由測量師同工程師聯合檢查緊急個案樓宇等。

法官提出建議梗有理由，唔會無的放矢。區載佳尋日居然死撐，話現行安排冇唔妥，冇必要每次驗樓都「行孖咇」，又話法官批評屋宇署測量師做嘢求其，「只係針對個別同事嘅做事方式，同整個職系無關」喎。

叮！如果單咇係掂，屋宇署做嘢認真嘅，點解呢頭睇過話冇問題，嗰頭就冧樓？劏房問題涉及面廣，屋宇署搞唔掂嘅，當局就應該設立跨部門機制協調處理。人命大過天，高官以民為笨，唯官獨尊，擇惡固執，簡直豈有此理！

尊重係假，抗命至真。其實區載佳嘅回應已經預咗啦，死因庭裁決當日，屋宇署誓神劈願咁話「尊重死因庭裁決」，跟手就反轉豬肚，拒絕死因庭就改善樓宇視察提出嘅建議，我行我素，包括堅持行單咇。

死因裁判官當日話，出事大廈已經係「彌留狀態」，隨時冧得。計太一叮話齋，屋宇署拾吓拾吓，連自己衰乜都搞唔清楚，旨意呢個「彌留病人」拆除都市炸彈聽死硬，市民不如出街嗰陣戴番頂鋼盔好過啦，叮！