醫局管理爛透心 一錯再錯何足奇

曾因為見死不救而臭名遠揚嘅明愛醫院，幾乎又搞出人命喇。今次衰乜嘢？咪係衰輸錯血囉。

話說一位女病人日前喺明愛做骨科手術輸咗兩包血，點知手術後病情唔止冇好轉，仲惡化至腦出血，急送廣華醫院腦外科後至發現，明愛醫院擺烏龍，將呢位女病人嘅配血結果同一名男病人調亂咗，原本應該輸B型血居然輸咗Ａ型，搞到女病人要入深切治療部留醫，情況嚴重。不幸中之大幸係，嗰位男病人好彩冇輸到血咋，唔係分分鐘又多個人中招。

輸錯血唔係講玩，隨時死得人。食物及衞生局局長周一嶽例牌耍官腔，話對事件非常關注同十分遺憾，又話已責成醫管局徹查事件喎。而醫管局行政總裁梁栢賢就話嘞，呢次係嚴重事故，同人手短缺無關，可能係化驗室出錯，向病人家屬致歉喎。

叮！好心班官僚耍官腔都搵新鮮啲嘅講吓喇，次次爆親大鑊，唔係「關注」，就係「遺憾」，然後「徹查」，鋪鋪都係三幅被，悶唔悶啲吖！再講，三歲細路仔都知輸錯血係嚴重事故喇，使乜官僚提醒噃。仲有吖，今次事故仲未調查，原因未明，當局咁快就話唔關人手短缺事，又話係化驗室出錯，唔通此地無銀三百両？

唉，輸血關乎人命，居然可以調亂血型，AB不分，咁鬼兒戲，咁鬼烏龍，除咗第三世界落後國家，睇怕只有香港公立醫院至會出現，而且唔係一次出錯，而係一錯再錯，你話羞唔羞家吖，你話係咪草菅人命吖。

查實，草菅人命嘅又點止明愛醫院吖。本港公共醫療系統早已五勞七傷，病入膏肓，除咗輸錯血，打錯針、開錯藥、割錯器官，甚至調錯屍，醫療事故層出不窮，無奇不有。

遠嘅唔講，淨係睇醫管局最近嗰份《風險通報》已經嘆為觀止。病人左眼有事，醫生竟然左右不分，將麻醉藥注射落右眼；有醫護人員甚至烏龍到將導管置入另一位病人身上。今時今日，公立醫院睇病好似盲俠賣武咁，輸錯血又有乜出奇吖。

計太一叮話齋，公共醫療百病叢生，病根其實一清二楚，就係醫管局無能，資源錯配，周一鑊要「關注」嘅，係點樣對症下藥，一勞永逸解決問題，而唔係諱疾忌醫，頭痛醫頭，腳痛醫腳。再咁落去，公共醫療同輸錯血一樣，遲早玩完，叮！