房租飆升苦基層 港府建屋太低能

以前小學生作文寫「我的志願」，通常話想立志成為科學家、太空人、企業家，又或者律師、醫生，諸如此類。不過，以後中文老師改作文，遇到最多嘅答案可能會係：「我要做公屋戶！」

太一叮冇誇張㗎，獲編配到一間豆腐膶公屋呢個卑微願望，已經成為好多後生仔女嘅人生目標之一。大學生一畢業，唔係第一時間搵工，而係申請公屋。講多無謂，數字最實際，公屋輪候冊申請人突破十五萬大關，比○七年激增四成，三十歲以下嘅申請者佔咗近一半，當中四成擁有專上學歷，真係唔到你唔信㗎！

後生細仔抱負竟然係有公屋住，到底係咪無大志呢？兩睇啦。今日嘅香港樓價高到冇朋友，就連基層住屋嘅呎價租金都分分鐘貴過豪宅。社協嘅調查顯示，劏房同板間房過去一年平均加租兩成，甚至有被瘋狂加租一倍半。唔好話初出茅廬嘅後生仔啦，就算一般市民都頂唔順，想入住一間廉租屋，實在係港人喺瘋狂樓市下嘅合理願望。

不過弊就弊在，喺港府嘅失敗房屋政策下，上樓難過上山嗰吓問題大呢，港女夢想「住間廉租屋」，隨時比「嫁個有錢人」更加困難。正如調查發現，由於通脹飆升生活艱難，劏房蝸居族想搬屋改善環境都唔得，但係輪候公屋咩，三年又三年，有市民等咗近十年都冇消息，就嚟等到變「望屋石」。從呢個角度睇，年輕人立志入住公屋，何止唔係無大志，直頭係志氣可嘉，敢於向高難度挑戰！

樓價癲到失魂，港人無處容身，但係港府喺增加公營房屋方面做過啲乜呢？吖，係喎，上年施政報告有一個叫「置安心」嘅碩果僅存建屋大計喎，不過計劃雷聲大雨點小，如果唔係計劃被人翻舊帳，踢爆建屋進度慢過龜爬嘅話，相信都冇乜人記得起咯。

按計劃，港府本來會喺屯門等五區覓地建屋共五千個單位，畀夾心階層先租後買。好嘞，計劃公布咗十個月，進度如何呢？搞笑咯，其中三區竟然連選址都未有，沙田小瀝源項目未諮詢區議會，即係話隨時有變數，而已動工嘅青衣項目亦工程進度緩慢，工地日日喺度曬太陽。咁即係話，置安心落成遙遙無期。

一句講晒，房租飆升苦基層，港府建屋太低能。各位高官唔該醒少少啦，增建公屋又好，復建居屋又好，總之快快紓緩市民蝸居之苦，唔通你哋真係想見到香港通街都係無處容身嘅露宿者？