屍油當食油 遲早人吃人

電視劇《水滸傳》正熱爆內地，孫二娘開黑店賣人肉包子嗰段當然唔少得。原來現實仲恐怖，母夜叉呢招濕濕碎咋，家陣神州無奇不有，無良奸商直頭將殮房當廚房，火葬場當榨油坊，問你服未！

近排網上勁傳，廣西賀州有連鎖粉麵店將從火葬場平價收番嚟嘅人類屍油，充當食油烹煮當地著名美食螺螄粉。爆料者仲話係引述廣西政法委通告，「現代孫二娘」已經落網，冇花冇假，搞到人心惶惶。咦，本港唔少副食品來自廣西，容乜易中招o架，你話唔驚就假。

唔使審，內地當局例牌出來「闢謠」，話冇咁嘅事，亦冇人報案，又話派人去食肆查過，食油冇問題喎。官府大派定心丸，可惜講者自講，民眾根本唔信，事關今時今日官員嘅誠信仲差過妓女，叫人點信佢哋吖。

查實，空穴來風，未必無因，內地近年已經多次出現屍油當食油嘅傳聞，官方次次「澄清」，但「謠言」仍屢禁不止，而且仲愈傳愈恐怖添，難怪大家寧可信其有，不可信其無。

冇法子啦，內地官場腐敗，奸商唯利是圖，導致黑心食品氾濫成災，喺咁嘅情況下，有人將屍油當食油，又有乜嘢出奇吖。

講開問題食品，簡直係花樣百出，無奇不有，鑊鑊新鮮鑊鑊甘。醋用工業冰醋酸生產、奶粉用三聚氰胺製造、豬用瘦肉精餵養、米用石蠟加工、火腿用敵敵畏浸泡、油唔係用地溝油就係用屍油……真係愈講愈恐怖。

更恐怖嘅係，連「人吃人」咁泯滅天倫嘅事都有吖。前排有韓國電視台播放咗據講喺中國拍攝嘅節目，介紹用死嬰肉製作「人肉膠囊」嘅過程。唔係冇根據，韓國科研機構化驗顯示，呢啲膠囊粉末嘅DNA同基因，有近九成八同人類相同。正如內地官員話齋，不管你信不信，我反正信了。

叮，同胞們金錢至上，道德淪喪，再恐怖嘅事都做得出吖。神州大地表面上和諧盛世，經濟蒸蒸日上，其實係人欲橫流，烏煙瘴氣，十足魯迅筆下「吃人」嘅年代。

計太一叮話齋，再咁樣落去，睇怕唔使幾耐就會出現真正嘅人吃人，到時咯喎，屍油係小兒科咋，人丸、人雜隨時都有吖，叮！