爛果報生安白造 淫賤黎屈得就屈

有句俗語叫做「來說是非者，便是是非人」，意思係講人是非嘅人，本身就係製造是非嘅人，簡單啲講即係賊喊捉賊咁解，呢，淫賤黎就係呢種人喇。

話說去年十一月十九日港府宣布推出「額外印花稅」措施遏抑樓價，長實地產投資董事郭子威同日喺微博發放相關訊息，指當日購入盛薈單位嘅買家不受新措施影響。佢咁講唔係冇根據o架，事關財政司司長鬍鬚曾當時被記者問及，十一月二十日之前簽訂臨時買賣合約會唔會受到新措施影響，鬍鬚曾嘅答案係「明天起才計算」。點知爛果報唯恐天下不亂，再次發揮譁眾取寵、造謠生事嘅本性，大字標題指郭子威出口術誤導買家喎。

事實又係點嘅呢？根據稅務局白紙黑字嘅回覆，只要買家喺去年十一月二十日之前已訂立臨時買賣合約，就毋須繳納額外印花稅。嗱，事實證明郭子威絕對冇講錯，誤導買家嘅唔係長實，而係淫賤黎嘅爛果報吖！

話時話，爛果報生安白造，杜撰新聞，早就見怪不怪，最可悲嘅係運輸及房屋局常任秘書長栢志高及地政總署署長譚贛蘭等高官，居然同爛果報一唱一和，異口同聲指郭子威嘅言論不恰當，涉及誤導。而包括立法會議員李永達等政客亦乘機抽水，推波助瀾，將事件愈鬧愈大。

其實正如有人話齋，只要有腦嘅人都可以諗到，政府推出新措施根本冇可能追溯到之前嘅交易，栢志高及譚贛蘭枉為高官，居然連咁顯淺嘅道理都唔明，而且仲要夾埋爛果報來誤導市民，簡直豈有此理。叮，官商勾結就見得多啫，高官淪落到同淫媒勾結你又聽過未吖！

講到呢度，有人可能會問，點解爛果報成日惡意針對長實？答案好簡單，咪就係因為長實主席李嘉誠不屑與淫賤黎為伍，拒絕喺誨淫誨盜嘅壹淫媒落廣告咯。淫賤黎食唔到葡萄就話葡萄係酸嘅，於是成日玩唱衰，玩抹黑，玩滋擾，無所不用其極。呢，李嘉誠捐款十億元喺大埔洞梓興建慈山寺及七十六米高嘅觀音銅像，旨在弘揚佛法，福佑香江，令社會更祥和，係功德無量嘅善舉。點知爛果報又含血噴人，誣衊李先生「借佛建陵園」，搞到佛都有火，連出家人覺光法師都忍唔住拍案而起，怒斥爛果報扭曲事實！

江山易改，淫賤難移，除咗杜撰新聞，譁眾取寵，睇怕爛果報都玩唔出新花樣咯，叮！