衣食住行樣樣漲 最低工資淥豬腸

中秋本應闔家同歡，無奈百物騰貴，搵食艱難，基層打工仔惟有俯首低吟：明月幾時有，苦笑問青天。

通脹陰影揮之不去，內地上月消費價格指數為百分之六點二，雖然係連升三十七個月後首度回落，但正如巴士阿叔話齋，問題未解決。專家預期，整體物價未來幾個月仍會處於高位，尤其係食品價格持續攀升，對基層民眾影響最大。內地問題未解決咯喎，香港自然大大鑊，更何況，就算內地通脹唔進一步惡化，人民幣匯率係咁不斷飆升，香港都冇運行喇！

更弊嘅係，物價上升快過火箭，工人加薪就慢過龜爬，點頂吖？冇錯，依家話就話實施咗最低工資，可惜最低工資都保障唔到基層打工仔嘅生活o架。通脹猛如虎，人工好似滾水淥豬腸咁愈縮愈奀，最低工資又有乜嘢用吖。

呢，有關注團體分別調查咗幾十項街市同超市貨品價格，今年三月至八月，超過一半街市貨品同近半超市貨品加咗價，新鮮食品升幅更得人驚，其中雞蛋同蘋果升幅超過兩成。通脹蠶食收入，最低工資得不償失，叮！

搵食艱難，搭車返工同樣唔易嘅咋。公共交通工具爭相加價不特止，有啲收費根本唔合理，可以講係撳住嚟搶。有政黨批評，巴士過海後分段收費，比行類似路線嘅非過海巴士最多貴六成，唔少乘客為慳一蚊幾毫，惟有被迫轉車，實在無奈。

港鐵車資計算更騎呢，由紅磡去羅湖或落馬洲，同紅磡去上水比較，雖然只差一個站，但就足足貴咗十幾蚊，你話係咪搶錢吖！

叮！小數怕長計，基層打工仔每日慳些少，就已經可以解決唔少生活難題嘅喇。弊在夕陽政府麻木不仁，任由公共交通機構搶錢，甚至有求必應，逢加價必批。尤其係年年賺大錢嘅港鐵，政府身為大股東，居然帶頭加價，簡直係為富不仁。

通脹肆虐，政府無能，打工仔無助。舊年港人整體生活指數仲低過金融海嘯之前，其中經濟分類指數更加連○三年沙士嗰陣都不如。計太一叮話齋，旨意呢個跛腳鴨政府做嘢，港人生活只會好似王小二過年咁，一年不如一年。靠煲呔曾打救？不如望「紫荊俠」出手仲實際啦，叮！