運輸署阻頭阻勢 鐵人賽無以為繼

唔講唔知，原來香港嘅三項鐵人運動水平好高，運動員經常揚威國際賽事。前年喺菲律賓勇奪三金兩銀 ，舊年喺南韓又攞一金兩銀，今年七月香港代表黃俊堯又喺新加坡奪得金牌，真係值得一讚o架！

可惜，水平高又點吖，港府唔單止冇提供協助，仲阻頭阻勢，諸多刁難。呢，ITU三項鐵人亞洲盃原定下月喺大美督舉行，本來係本港選手表演嘅大好機會，點知當局居然拒絕封路，賽事被迫取消。運輸署話喎，賽事可能對居民同交通造成滋擾，所以唔肯封路。

咁就奇嘞，三項鐵人亞洲盃已經喺香港辦咗好多年，點解運輸署年年都肯封路，偏偏今年就話會影響交通呢？冇錯，封路唔多唔少都會為市民帶來不便，但主辦單位淨係要求封大美督，而且只限周六同周日上午，車輛唔多，影響有幾大呀。講真，喺油尖旺封路就話大件事啫，封大美督有幾難喎！

咪話太一叮篤爆，其實封路一啲都唔難，難就難在當局卸得就卸，根本唔想做嘢。正如立法會議員王國興話齋，今次事件反映政府部門各自為政，處事官僚，冇盡力解決問題，搞到國際性賽事被迫腰斬，實在令人遺憾。

王國興就講得啱嘞，ITU三項鐵人賽喺亞洲地區輪流舉行，唔止南韓、新加坡等地搞到有聲有色，連菲律賓呢啲落後國家都可以順利舉辦，偏偏喺香港就因為運輸署唔肯配合而難產。衰啲講句，香港政府唔止輸畀南韓同新加坡，甚至連菲律賓都不如，你話係咪丟架吖！

官僚懶惰，賽事腰斬，香港運動員無端端失去一個主場作賽，爭取提高國際評分同排名嘅機會，唔就假。難為港府口口聲聲支持體育發展，提倡全民運動，仲話要申辦亞運添，真係大想頭，叮！

其實，舉辦國際賽事唔止可以推動體育運動，仲可以提升香港形象，推廣旅遊，一舉多得，港府連咁簡單嘅事都唔肯做，問你服未。講到賽事腰斬，享譽全球嘅香港國際龍舟邀請賽幾年前亦幾乎因為經費不足要停辦，雖然當時只欠大約一百萬，但係港府一毛不拔，最後要由民間團體捐款，賽事先至可以舉行。

唉，呢個政府吹水就叻，叫佢哋做嘢簡直仲難過上青天，煲呔曾吹水唔抹嘴，話要奮鬥至最後一分一秒喎，你信唔信吖？信不信由你，我反正不信，叮！