群鼠舞天星 食署條條揈

訪港遊客一定唔會錯過欣賞「幻彩詠香江」，但唔講唔知，原來另外一場表演仲精彩，叫「群鼠舞天星」，場面壯觀夾恐怖，鍾意刺激嘅朋友一定唔可以錯過。

天星碼頭巴士總站收車之後，「表演」準時開始，老鼠聯群結隊周圍搵食，左穿右插，橫衝直撞，旁若無人，而且仲係日日上演，五支旗杆，不見不散。

咁都得？天星碼頭位處尖沙咀核心購物區，盡覽維港美景，係遊客必到之處。動感之都變成老鼠樂園，香港之窗失色，罪魁禍首原來係食環署呢隻大懶貓。

本報接到遊客投訴，指天星碼頭有大量野鴿聚集，周圍鴿屎有礙觀瞻，臭不可聞，但從未見過有人清理。更離譜嘅係，食環署執法懶懶閒，雖然戙咗塊牌提醒市民唔好餵野鴿，但就算見到有人餵鴿亦一於少理。於是乎，一到晚上，野鴿散去，該處就變咗老鼠樂園，群鼠齊齊爭食，不亦樂乎。

成地鴿屎唔打掃，仲要將清理食物殘渣「外判」畀老鼠去做，食環署呢隻大懶貓都算離譜咯。鼠代官職，貓鼠一家親，你話老鼠有乜辦法唔愈來愈猖狂吖？呢，前幾年星光行曾發生過肥鼠勇闖快餐店，逾百食客被嚇到落荒而逃，問你驚未！

查實香港早已經係老鼠樂園啦，食肆發現鼠蹤不過小兒科，連法庭咁莊嚴嘅地方都有老鼠「旁聽」，更有外籍女遊客光天化日下喺中環畀老鼠咬傷腳，搞到香港個朵臭晒。

食環署資料顯示，油尖區今年上半年鼠患參考指數喺全港十九區排第十一。話時話，呢個指數實在令人不寒而慄，排名十一都有咁多老鼠，排名第一嗰區豈不是老鼠多過人！

唉，靠食環署呢隻大懶貓捉老鼠，有乜可能唔愈捉愈多吖。係呢，港府咪最鍾意成立「乜辦」、「物辦」嘅，冧樹就整個「樹木辦」，既然鼠患咁嚴重咯喎，睇怕要照辦煮碗整個「老鼠辦」嘞啩。

計太一叮話齋，挽救旅遊聲譽茲事體大，「老鼠辦」阿頭唔可以求其搵阿貓阿狗做，不如搵最痛恨「垃圾」嘅政務司司長唐英年擔大旗啦，老鼠遇着垃圾，相得益彰吖嘛，叮！