爛果報老作無恥 大學生罷看有理

唔係吖嘛？大學迎新營玩死女學生？呢單新聞聽落係幾轟動嘅，之不過咁，當你知道呢啲純屬爛果報添油加醋嘅老作，你就一啲都唔覺得轟動，而係覺得荒謬、無恥，叮！

話說日前有位中文大學女學生跳樓自殺，本來係一件令人慨嘆嘅悲劇，點知爛果報乘機大做文章，大字標題寫住「中大迎新營玩死女生」，夠晒聳人聽聞。不過，睇勻成篇報道，都搵唔到任何理據可以證明死者自殺同迎新營有關，一句講晒，爛果報擺明老作兼老屈！

「迎新營玩死女生」，呢項指控非同小可，中大學生梗係唔肯食呢隻死貓喇，喺忍無可忍之下，佢哋尋日召開記者會怒斥爛果報斷章取義。中大各新生輔導營籌備委員會話，爛果報以誣衊、譁眾取寵方式，對事情未審先判，誤導公眾，嚴重損害中大同中大學生嘅形象，要求爛果報同壹傳媒公開道歉。佢哋仲呼籲全體中大同學、教員同校友罷睇爛果報！

話時話吖，爛果報譁眾取寵當食飯，杜撰新聞當食生菜，呢啲醜聞早就見怪不怪咯。遠嘅例子有陳健康事件，爛果報為咗製造所謂「獨家新聞」，竟然無恥到畀錢啱啱死咗老婆同兩個仔嘅陳健康北上尋歡，自編自導炮製一場喪盡天良嘅尋歡騷，事件惹來全城怒吼，淫賤黎被迫死死氣登報道歉。而近嘅例子就有所謂竊聽風雲，兩個月前之嘛，爛果報又係頭版報道，指所有中港牌車輛都被內地公安加裝具備竊聽功能嘅「檢驗檢疫車載卡」，竊聽功能「覆蓋範圍遠至本港」，講到真嘅一樣，結果又被專家踢爆報道純屬子虛烏有；運輸業人士怒斥爛果報未有確切證據就發布似是而非嘅錯誤訊息，製造混亂，「無中生有到無恥地步」。

講到無恥咯喎，爛果報無恥嘅例子簡直罄竹難書喇。所以話啫，中大學生罷睇爛果報，絕對係明智嘅決定，起碼唔使再受爛蘋果污染，成個校園都清新啲啦。

講開又講，年輕人要吸收知識，了解時事，掌握社會脈搏，睇報紙當然係最佳途徑，之但係最緊要帶眼識報呀。嗱，唔係太一叮賣花讚花香，正義傳媒《太陽報》同《東方日報》就係大家嘅不二選擇嘞。《太陽報》啱啱改版，以全新面貌出現，朝氣蓬勃，活力四射，內容既專業，又豐富，啱晒年輕人口味；而全港銷量第一嘅《東方日報》，更加精益求精，與時並進，係名副其實嘅香港人報紙，全港三百幾萬讀者早就揀咗喇，你揀咗未呀？

總而言之，東方紅，太陽升，睇報一定要睇正義報紙。至於爛蘋果咯喎，正如中大學生話齋，快啲丟入垃圾桶喇，叮！