港鐵發財唔立品 服務質素打倒褪

港鐵又賺大錢喇！上半年盈利勁升兩成一，賺咗超過八十億，直頭係豬籠入水。弊在港鐵發財唔立品，錢賺得愈多服務愈打倒褪，業績愈好市民愈谷氣。

乘客對港鐵印象最深係乜？唔使審，一定係成日失驚無神跪低，搞到乘客踢晒腳。呢，淨係一條東涌線，早排半個月內就有四宗故障。以前話「趕時間搭地鐵」，家陣趕時間千祈咪搭港鐵。

「話咁快就到」變咗「話咁快就跪」，難為港鐵仲大言不慚，話事故發生頻率會有起伏，港鐵目前表現好過五年前，整體服務可靠性比歐美城市更優勝；甚至吹水話，近年維修保養開支有增無減添。

既然係咁，點解列車仲周不時跪低？港鐵話，列車以安全防護保障系統運作，一發生事故就會放慢行車，咁做係「安全第一」喎。

叮！安全第一係假，賺錢第一至真。港鐵年年賺大錢，但改善服務就一毛不拔，仲甩甩漏漏添。前日朝早落大雨，列車車廂竟然漏水，有乘客頭頂「中招」，落車後搵港鐵職員投訴，對方居然闊佬懶理，問你服未！

更得人驚嘅係，本報早排踢爆，觀塘線逾六成列車嘅車卡接駁位冇完全密封，小朋友隨時因為好奇被夾斷手指。仲有呀，前幾日東鐵線大學站差啲搞出人命，有位中大女生落車時因為車廂同月台之間空隙太闊，跌落路軌受傷，好彩及時救番上嚟咋。正如立法會議員話齋，東鐵安裝幕門一直冇時間表，加價就識，乘客安全就懶理！

叮！講到安裝幕門，真係火都嚟埋。港鐵前身地鐵公司十年前已經以加裝月台幕門嘅名義，向使用八達通乘客每程多收一毫附加費，但係一拖再拖，到依家仲有好多月台未有幕門，真係豈有此理。

更豈有此理嘅係，港府身為大股東，對港鐵貪得無厭百般縱容，監管失職不特止，港鐵年年賺大錢，仲批准佢年年加價。計太一叮話齋，港府簡直係劫貧濟富，靠害市民。叮！