麵包店濫發膠袋 膠官僚才是元兇

膠袋稅唔經唔覺實施咗兩年，本來以徵費防止濫用膠袋唔係唔好嘅，保護地球，人人有責吖嘛。不過可惜吖，再好嘅意念落喺港產官僚手中，最終都係搞到一塌糊塗。膠袋稅都唔例外，變成有名無實，膠袋用量不減反增。

膠袋稅點樣有名無實呢？一個統計數字就說明一切：膠袋徵費兩年，麵包店嘅膠袋使用量不跌反升，由○九年嘅兩億六千二百萬個增至上年嘅三億一千七百萬個，增幅兩成，成為零售業中濫用膠袋之冠！喂喂喂，膠袋稅顧名思義係寓禁於徵，但係徵費之後，浪費膠袋問題非但禁之不絕，反而仲嚴重咗，膠袋稅仲唔係廢嘅？

麵包店濫用膠袋成災，原因有兩個。第一，行業嘅經營模式出問題。環保團體抽樣巡查發現，六成連鎖式麵包店慣以「袋上袋」包裝麵包，即係先用平口袋將每個麵包獨立包裝，然後再用背心袋盛載，方便客人拎走。簡單啲講，即係每賣出N個麵包，就要用上N+1個膠袋，香港嘅減廢運動想唔打包至奇。

麵包店為營運方便同促銷，不惜賣大包大派膠袋，不過，計太一叮話齋，業界缺乏環保意識，只不過係膠袋被濫用嘅表面原因，真正元兇其實係港府至真。點解呢？咪又係嗰個問題囉：制訂政策思慮不周，執行時又唔識變通，最終變成弄巧反拙。即係咁，膠袋稅涵蓋範圍唔包括包裝麵包嘅平口膠袋，顯然就係漏招啦。之但係徵費實施後港府又冇加強宣傳教育，更加冇突擊巡查阻嚇濫用，業界促銷最緊要，終於咪搞出一場環保浩劫囉！

講開又講，膠袋稅千瘡百孔，左穿右漏，何止麵包店濫用咁簡單。塑料袋業界早前踢爆，膠袋稅實施後小商戶大量濫發俗稱環保袋嘅不織布袋，全港整體塑料用量更多。所以話啫，港府搞環保，嘥氣啦！

更搞笑嘅係，港府唔知黐咗邊條筋，一句為減省行政工作，建議膠袋稅徵費日後毋須上繳，改由商戶「坐以袋幣」喎，就算唔係搞官商勾結，利益輸送，都係擾民兼搵笨啦。

環境局製造垃圾政策，諗落認真諷刺。好心港府有啲環保意識，快快回收呢個廢物措施啦，為政貴於靈活變通吖嘛。如果唔係，太一叮就有充分理由懷疑，港產官僚唔通真係硬膠一塊嚟嘅？叮！