三世祖奉若上賓 討公道官搵民笨

呢鋪真係唔叮爆佢鎯鎯都唔得！

喂，菲律賓嗰一個經常嘴角含春陰陰笑嘅三世祖總統阿基佬……唔好意思，阿基諾至啱……至今尚欠香港一筆血債，有乜資格成為中國政府高規格接待嘅VIP貴賓？菲律「賓」只不過係一個譯音，完全冇必要搞到「賓」至如歸又「賓」主盡歡啦，吓話！

舊年發生馬尼拉八二三人質慘劇之後，三世祖嘅輕佻表現已經激嬲全人類，點不知事隔一年之後佢老哥居然死不悔改，一口拒絕道歉同賠償喎，再一次成為全港公敵。至於關乎中菲兩國嘅南海主權爭議問題，阿基諾對中國一向咄咄逼人，國人同胞無不視之為領土侵略者。

喺呢個國仇家恨嘅情況之下，中國政府接待賓賓總統訪華已經唔啱數，更加令人吹到啤一聲嘅就係，京老爺文質彬彬送大禮，簽署經貿同旅遊等等多項投資合約，總額高達五百幾億港元。當中仲包括一項《中菲經貿合作五年發展規劃》，爭取將去年約二千一百五十五億港元嘅貿易額，增至二○一六年約四千六百七十六億港元。難怪內地輿論怒斥，菲國殺我同胞、掠我領土，中國開門揖盜、自降國格，叮！

人質慘劇幸存者以及死者家屬尋日去到外交部駐港特派員公署，要求中央政府關注人質事件。遇難領隊謝廷駿嘅兄弟又向外交部遞交近萬名市民簽名嘅請願信，希望中央出頭向菲律賓施壓討公道。

口口聲聲以民為本嘅中央會唔會順應民意？呢家嘢咯喎，真係有保留，事關太一叮愈來愈覺得中國政府非常之咁抗拒「討公道」三個字。你知啦，如果你係中國老百姓，你去上訪伸冤係難比登天㗎，輕則被截，重則被罰，罪名林林總總，總之有冤無路訴。既然係咁，京老爺會唔會將自己變成一個「訪民」？又會唔會向來自賓賓政權嘅貴賓「伸冤」？

全國政協委員劉夢熊講得啱呀，中國現如國際黃大仙，侵略有獎，惡有善報。連內地《環球時報》都以《中國沒必要對阿基諾特別熱情》為題批評，中國待阿基諾三世如上賓，容易令周邊國家以為，只要鬧得愈兇，就愈得到好處。

三世祖奉若上賓，討公道官搵民笨。呢家嘢有名堂o架，寧贈友邦，勿予家奴。激氣成咁，叮足佢三世都唔夠啦，叮叮叮！