作古仔抹黑佛門 爛果報神憎鬼厭

爛果報杜撰新聞，鑊鑊新鮮鑊鑊甘，早前誣衊「中大迎新營玩死女生」，啱啱畀中大學生插完，點知淫賤黎可能嫌插得唔夠爽啩，一於變本加厲，繼續老作，今次仲將火頭燒到佛門清淨地，搞到佛都有火，叮！

話說長實主席李嘉誠捐款十億，喺大埔洞梓山興建慈山寺及七十六米高嘅觀音銅像，總面積等於五個政府大球場，落成後唔只會成為本港新地標，仲可以福佑香江，令社會更祥和，係功德無量嘅善舉。點知爛果報居心不良，竟然大字標題寫住「政府明益批50萬呎名穴，李嘉誠借佛建陵園」，聲稱寺內有李家專用佛堂、李家幕後操縱慈山寺財政與運作，又話政府低價批地，並沒有要求慈山寺需向公眾開放，而地契更留有灰色地帶，容許修改為擺放骨灰龕，為慈山寺日後成為首富陵園鋪路喎。

嗱，呢啲咪叫做無中生有、譁眾取寵囉。事實係點呢？香港正覺蓮社社長覺光法師日前以慈山寺董事局主席身份刊登聲明，澄清慈山寺係非牟利組織，旨在弘揚佛法、研究佛學，絕對無涉及任何私人利益。覺光法師仲話，李嘉誠一個人出錢畀全世界人禮佛，並沒有要求回報，爛果報嘅報道扭曲失實，嚴重損害慈山寺及李先生名譽，慈山寺保留法律追究權利。

係咯，爛果報杜撰新聞，造謠生事，唔只誣衊李嘉誠先生，而且中傷佛門，簡直係神憎鬼厭，一於追究到底喇。呢，好似台灣咁，壹淫媒嘅台灣《壹週刊》因不實報道損害《自由時報》形象，啱啱畀台灣高等法院二審判處敗訴，必須喺封面刊登道歉啟事。呢啲咪就係惡有惡報囉，對付壹淫媒呢種傳媒敗類，絕對唔可以手軟o架！

講開又講吖，爛果報長期惡意針對李嘉誠，抹黑中傷、滋擾生事、含血噴人，無所不用其極，大家早就見怪不怪咯。今年初，爛果報話李家重建深水灣大宅獲贈近萬呎樓面，又係話政府明益，最後證實報道純屬子虛烏有，作得就作。其實，淫賤黎咬住李嘉誠唔放，背後動機係人都知喇，一來，李先生由始至終睇唔起自認契弟嘅淫賤黎，拒絕喺誨淫誨盜嘅壹淫媒落廣告，淫賤黎懷恨在心，咪不斷玩抹黑唱衰囉；二來咯喎，爛果報老作當食生菜，毫無公信力可言，連大學生亦發起罷睇，搞到銷量不斷下跌，為咗救亡，惟有譁眾取寵，企圖借名人效應催谷銷量，苟延殘喘。

話時話，既然淫賤黎想像力咁豐富，作古仔咁叻，做傳媒實在嘥料，計太一叮話齋，佢不如轉行做編劇拍電影好過，就算拍鹹片都唔錯。爛蘋果，收皮喇！