漠視安全被警告 管樹官僚瘀到爆

事實再次證明，樹木交畀廢柴管理，等如搵人命較飛！

管樹官僚真係廢到冇朋友，多年嚟懶理病樹枯壞，種下冧樹殺人禍根，固之然被人話草菅人命啦，但原來叫佢哋去打理樹木，一樣分分鐘搞出人命。

事情係咁，工會踢爆康文署，漠視員工安全，鋸樹工作搵命博。總括嚟講，康文署犯下三宗罪。第一，未有為員工提供鋸樹手套；第二，要員工用繩索爬樹；第三，不當存放鋸樹用電鋸。電鋸所用電油屬危險品，就咁求其放喺康文署場地士多房，對前線員工十分危險。

嗱，太一叮唔係樹木專家，不過純粹以肉眼「目測」，都知康文署好有問題啦。喂，電油隨處放就肯定唔啱，冇為員工提供保護裝備，一樣係漠視人命。大家如果睇過《德州電鋸殺人王》呢套戲，相信都見識過電鋸嘅殺傷力o架啦，康文署要員工徒手操作電鋸，萬一出咗意外，唔好話搞到手指橫飛血肉模糊咁恐怖，就算發生任何工傷意外，康文署都難辭其咎。

更離譜嘅係，港府宣傳片都識講啦，高空工作注意安全吖嘛。鋸樹工作擒高擒低，必須清理嘅椏枝有時更加成幾層樓咁高添，康文署竟然淨係畀條繩，就要員工好似飛天蠄蟧咁喺半空盪嚟盪去爬樹鋸木，諗起嚟都得人驚。正如立法會議員話齋，十足十係攞人命較飛！

最抵死嘅係，俗語有話官官相衞，之但係康文署漠視員工安全，連勞工處都睇唔過眼，發警告信要求確保僱員工作安全，提供適當保護裝備。唉，人要臉，樹要皮，康文署搞到被同僚出信警告，今鋪都算瘀到爆咯！

鋸樹員工喺半空揈嚟揈去，險象環生，太一叮即時聯想到政務司司長唐英年。一則因為佢係管樹大隊長，對問題責無旁貸。二來咯喎，唐司長為官出名條條揈，康文署懶理員工安全，點知唔係師承自佢嘅作風？如果係咁，套用番唐司長嘅名句，管樹官僚「完全係垃圾」！

所以話啫，康文署漠視人命，唐司長為人為己，今次絕對不能袖手旁觀條條揈。嗱，唐司長，要你保證唔再發生冧樹慘劇，你就話無能為力啫，防止員工出事，以免政府被人告到甩褲，斷估你應該好樂意嘞啩。當然啦，如果唐司長心甘情願做「廢柴辦」大當家，自認係廢柴之中最廢嗰個，咁就自當別論啦，叮！