求職陷阱騙財色 不容警方再姑息

橋唔怕舊，最緊要受。《警訊》成日呼籲大家提防求職陷阱，之但係年年一樣有大量青少年誤墮天仙局，太一叮不禁問句，到底出咗乜嘢問題？

喺解答呢個問題前，不如先聽吓消委會點講吖，應該可以搵到靈感。消委會今年上半年接獲四十一宗求職變消費嘅投訴，比起上年全年嘅十八宗，勁升超過一倍。至於行騙手法咯喎，全部舊酒新瓶熟口熟面，都係以招聘為名，誘騙消費為實，受害人未上工，先被游說用數以萬元計金錢報讀課程，甚至向財務公司借貸嚟交學費，最終搵錢變咗使錢，打工變咗被人打劫。

究竟係乜嘢世代？經濟好咗，騙案反而增多，唔通夕陽政府等收工，所以連專呃年輕人零用錢嘅無膽匪類都肆無忌憚，湧晒出嚟作案搵食？嗱，其中一名受害人陳先生，應徵美容療程推銷員，工都未返就被游說報讀課程同參加療程，被人呃咗近十萬元，呢一課學費認真貴！

話時話，年輕人誤墮求職陷阱，被人騙財算冇咁慘㗎嘞，萬一落入援交集團魔爪，不幸淪為援交童女或者未夠秤「鴨仔」，咁就抱憾終身。不法之徒吸納援交新血，招數咪又係借「筍工」為名，誘騙為實囉。

好嘞，答番條問題先，求職騙局來來去去嗰幾樣花款，點解不斷會有人上當？警方不停叫人小心搵工陷阱，點解中伏嘅人又不減反增呢？答案之一，當然係年輕人入世未深，加上心急搵錢，所以特別容易被人呃啦。之但係咁，太一叮認為最主要嘅原因，其實係八個字：警方懶散，打擊不力！

道理好簡單。第一，如果警方大力取締呢啲職場寶藥黨，年輕人就算容易被呃，都唔會發展到咁猖獗。第二，不法之徒以欺詐手法騙財，呢啲根本就係不折不扣嘅犯罪行為，打擊罪行係要身體力行，一味用把口叫人小心係冇用㗎。試諗諗，若然警方呼籲夜歸女子提防色魔，香港就可以冇晒風化案咩？咁就唔會發生不舉色魔圖姦花甲老婦嘅驚人新聞啦。

嗱嗱嗱，各位警隊阿哥阿姐，唔該咪再諸多藉口推搪，話乜嘢法例存在灰色地帶，講乜嘢執法困難。如果法例係存在漏洞，被不法之徒有機可乘騙財害人，警方更加責無旁貸，快快提出修例甚至立法建議啦。身為治安部門，眼見市民被騙徒撳住嚟搶都唔做嘢，求職騙案唔大升特升就有鬼咯。

「一哥」曾偉雄話喎，要設專組打擊暑期工騙局，計太一叮話齋，不如設專組研究吓點解警方會對職場寶藥黨姑息養奸好過啦，叮！