國民教育觸礁 跛腳政府跪低

點謂之「一事無成」？何謂「半途而廢」？如果大家想知呢兩句成語點解，唔使問中文老師o架，睇吓班教育局高官就知嘞！

教育局大鑼大鼓搞德育及國民教育，小學明年九月先行，中學一三年跟住嚟，講到事在必行咁款。你知啦，香港嘅道德問題的確好鬼令人擔心，加強德育係有必要嘅。呢，前排之嘛，一場僭建風暴揭發大批權貴偷雞違規，高官知法犯法，議員立法枉法，一區之首曾蔭權更加目無王法，厚顏到畀人踢爆之後仍然遲遲唔將僭建物拆除。社會有咁多壞榜樣，唔加強道德教育點得呀？

哈，之但係好可惜，正當四個月諮詢期快將結束之際，呢個教育新政突然傳出難產消息喎。喺一片反對聲音之下，夕陽政府據講暫時唔喺中學推行國民教育，只會按計劃喺小學實施，講得好聽叫做微調，其實即係跪低咁解。

教育新政半途而廢，唔係第一次o架嘞。近嘅有分拆教科書逼書商減價，可惜書商企硬，反而害到學生買唔到書，僵局到依家仲未拆得掂。遠嘅就有母語教學，搞到七國咁亂，教育局惟有跪低，返回原地。教育新猷次次唔湯唔水，餐餐失敗告終，咁仲唔係一事無成？

講番德育及國民教育，本來呢，培養學生美德係教育應有之義，國民教育亦有好多國家做緊，新課程理應獲教育界同家長支持，但係點解落到港產官僚之手就變成深海炸彈，碰都唔碰得？答案好簡單，港府無能囉。

港府吹風解畫話，新科目驚同現時嘅中學課程重疊，新高中學制又啱啱起步，怕同學會吃不消喎。嗱嗱嗱，你話港府係咪抵插吖，以上兩個原因唔係今日嘅事，教育局官僚事前未經深思熟慮，新課程話做就做，話取消就取消，你估細路哥玩泥沙咩！

不過，計太一叮話齋，港府取消喺中學推行國民教育，背後原因係怕被人鬧就真。新課程建議一出，就被人質疑係「洗腦」教育，社會上反對之聲不絕如縷，跛腳政府唔夠力頂住民意壓力，唔跪低多一次點得呀？

話時話，香港咁多人抗拒國民教育，呢個正係人心未回歸嘅表現，港府責無旁貸，但中央政府自己亦都要檢討吓嘞。若然內地唔係貪官污吏橫行、黑心食品氾濫、維權人士郁吓就「被失蹤」，國民教育唔使催谷，香港學生都爭住讀啦，係咪？叮！