派錢照遠唔照近 回鄉長者遭遺棄

跛腳政府唔止腦殘，仲發雞盲添。呢，六千蚊派勻全世界，移居海外嘅港人只要合乎要求，一樣可以袋袋平安，但係回鄉養老嘅公公婆婆就慘嘞，隨時一個鏰都攞唔到，因為當局根本當佢哋透明。

係人都知，香港衣食住行樣樣貴過人，無奈之下，唔少長者被迫返回內地養老。不過，近年內地經濟起飛，百物騰貴，人仔又係咁升值，內地生活水平愈來愈高，長者手頭積蓄愈來愈唔見使。本來以為港府派六千蚊可以幫補吓喇，點知到頭來好可能得個吉。

嗱，港府話長者只須由親友代交或者郵寄登記表格，就可以攞錢，但好多回鄉養老嘅公公婆婆根本唔可能攞到錢，好似蜑家雞見水咁，睇到飲唔到。點解？事關好多公公婆婆長居內地，香港嘅銀行戶口早已取消，喺本港冇人冇物，有啲甚至連智能身份證都冇，咁又點樣登記吖。

好似七十七歲嘅袁伯咁，兩公婆都有病，自己又行動不便，成日要睇醫生，積蓄已使得七七八八，十幾年前移居中山之後從未返過香港，手頭只有一張舊款香港身份證，叫佢哋返港登記攞六千蚊，咪仲慘過攞命，叮！

弊在呢類「N無長者」唔係少數，淨係廣東中山估計已經有過百人，全廣東嘅數字更難以估計。港府連萬里之遙、遠在北美嘅港人點攞錢都照顧到，偏偏對近在咫尺嘅公公婆婆闊佬懶理，簡直係本末倒置。正如有關注團體話齋，當局根本冇理會住喺內地長者嘅需要。有立法會議員早就寫信畀當局，提出內地港人領六千蚊面臨嘅困難，但當局一味耍太極、玩敷衍，完全當呢班公公婆婆冇到。

話時話吖，長者移居內地多數出於經濟原因，貪消費較低吖嘛。問題係，家陣人仔狂升，物價飛漲，內地消費水平就快拍住香港嘅喇，本來諗住港府雪中送炭派六千蚊可以幫補吓，點知好夢可能成空，真係情何以堪。港府照遠唔照近，為移居外國做寓公、生活無憂嘅港人錦上添花，大拿拿派幾十億眼都唔眨吓，呢個政府簡直荒謬到冇朋友。

姜太公封神封漏自己，皆因私心作怪，想將玉皇大帝個位留畀自己。計太一叮話齋，港府派錢獨漏回鄉養老嘅長者，唔止私心作怪，簡直就係忤逆，叮！