旅客逼爆深圳灣 港府倒米兼失禮

香港旅遊業早前啱啱報捷，七月份訪港旅客高達三百八十幾萬人次，大增兩成二，創下歷史新高，其中內地客增幅更達到三成幾添。其實，內地客早已佔咗香港旅遊業大半壁江山，如果唔係靠佢哋支撐，旅遊業呢條支柱可能早就冧咗咯。

正所謂，有朋自遠方來，不亦樂乎。內地客成為香港旅遊業嘅主力，既係人客，亦係財神爺，主人家本應好好招呼佢哋先至係o架，點知事實啱啱相反。惡導遊及黑店宰客呢啲醜聞姑且不提，淨係口岸排隊過關費時失事就丟晒架喇。呢，本報記者到深圳灣直擊旅客過關情況，發現呢個所謂一地兩檢嘅管制站人頭湧湧，旅客大排長龍，動輒要等兩粒鐘先至可以辦妥入境手續，一地兩檢仲慘過兩地兩檢，搞到怨聲載道。

正如有位旅客話齋，「咁鬼多人，過關等咗成個半鐘，仲諗住深圳灣會快啲，點知深圳嗰邊可以用自助通道，香港呢邊就冇，真係焗住等。」係咯，深圳灣管制站七國咁亂，問題正正出喺香港呢邊。現場所見，內地出境大堂雖然人多，但過關情況尚算順利，唯獨到咗香港呢邊就出事，由於非港人櫃位不設自助過關，入境手續均以人手處理，所以咯喎，內地旅客被迫癡癡地等，最快都要等一粒鐘先至可以過關，如果唔好彩遇上一位手腳慢啲嘅入境處職員，隨時等兩粒鐘都有之吖。

講到呢度，大家可能覺得奇怪，深圳灣管制站四年前先至啟用，設備應該好先進，冇理由咁落後咁失禮o架。講到尾，咪又係設計同管理有問題囉。當初港方閉門造車，既冇諮詢業界意見，亦冇考慮到兩地交往愈來愈頻繁嘅事實，嚴重低估過關人次，結果管制站啟用冇耐就「爆燈」。其實，除咗深圳灣之外，實施廿四小時通關嘅落馬洲管制站亦有人滿之患，弊在入境處一成不變，唔識與時並進增加新設施配合，導致皇崗口岸隨時因漏斗效應而逼爆，你話係唔係食古不化吖！

唉，黃台之瓜，何堪再摘。香港經濟已經夠單調嘅喇，四大支柱搖搖欲墜，其中旅遊業全靠內地客支撐先至頂得住咋，港府連通關咁簡單嘅事都搞到一塌糊塗，「好客之都」變成「趕客之都」，簡直係倒米兼失禮。再咁落去，就算中央點樣送禮，點樣放人落嚟，都係嘥氣喇，叮！