單車意外頻生 皆因官僚靠害

「亞洲車神」黃金寶希望明年喺倫敦實現奧運獎牌「零的突破」，港人都希望佢嘅夢想成真。不過咁，夢想歸夢想，香港單車運動掣肘多多，舉步維艱，呢個夢想究竟可唔可以實現，真係冇人知。

冇錯，香港單車隊近年屢創佳績，掀起一股單車熱，港府亦乘機抽水，話要起條打通全新界嘅超級單車徑喎。可惜又係雷聲大雨點小，由於配套設施甩漏跟唔上，新手只能喺車來車往嘅單車徑同班老手爭路，隨時「出師未捷車先炒」，做唔成車神事小，搞出人命事大。

唔係太一叮靠嚇o架。呢，單車意外愈來愈多，由○八年嘅一千五百幾宗增加到舊年嘅一千九百幾宗，淨係今年上半年已有過千宗，其中八人不幸喪生。警方話喎，單車意外傷者八成係初學，或者係唔熟路嘅人。

踩單車有幾牙煙？本報記者現場直擊發現，有啲收掣不及車撞車，有啲烏吓烏吓撞埋牆，有啲逆線行車，總之就係險象環生喇。

叮！踩單車仲刺激過格蘭披治一級方程式賽車，唔出意外至奇啦。正如香港單車會負責人話齋，單車徑太繁忙，唔適合新手踩，但港府監管不足，有啲細路識少少，膽粗粗踩出馬路都冇人理，建議設立單車公園，等初學者可以喺空曠同有安全設施嘅地方練習。

係嘞，單車公園既能夠幫學神先操Fit車技再上路，又可以保證單車徑安全暢通，點解唔快啲興建呢？有區議員踢爆，五年前已經建議康文署喺馬鞍山白石起單車訓練場同單車安全城，但拖到依家都未有聲氣。康文署嘅回應好搞笑，話起單車安全城嘅計劃，仲未有發展時間表喎。

咁即係點？係咪等於冇咗件事吖？單車意外愈來愈多，年年死人，而且死者多數係新手，連小學生都知好多意外同經驗及練習不足有關喇，對症下藥設立單車公園或者單車安全城，有百利而無一害，當局拖足五年，居然連時間表都攞唔出，擺明靠害啫！

冇計啦，夕陽政府翹埋雙手乜都唔做等收工，大事避得就避，小事拖得就拖。太一叮不妨送上一招，如果規定高官一定要踩單車返工，保證單車安全城好似「門常開」咁日夜趕工，好快就搞掂，叮！