童黨為患警束手 後生可畏官有責

國家領導人日前訪港，警方如臨大敵，保安之嚴密，莫講普通市民根本冇機會行近啲向領導人表達意見，甚至連烏蠅都幾乎飛唔到入去添，唔怪得有人話香港就快變成警察城市。

不過咁，警察城市還警察城市，警方對付和平示威嘅市民或者大學生就心狠手辣啫，但講到對付童黨打擊罪惡咯喎，佢哋就軟手軟腳，完全冇晒符。呢，將軍澳區童黨問題一向嚴重，警方一早就話會加強警力打擊，可惜始終得個講字，愈講童黨就愈多，愈講問題就愈嚴重，問你服未。

本報記者日前於深夜至凌晨時分巡視將軍澳各屋邨，發現唔少夜青周圍遊蕩，有啲喺便利店外徘徊，有啲喺屋邨商場飲酒喧嘩，有啲喺樓梯暗角聚集，居民見到紛紛兜路行，冇辦法喇，避之則吉吖嘛。話時話，呢啲童黨唔係人咁品o架，佢哋聯群結隊，打鬥、刑毀、濫藥、販毒、賣私煙等等，為所欲為。以童黨出沒黑點之一嘅健明邨為例，先後有互委會主席疑被童黨恐嚇及刑毀，其中一次仲畀二十幾個黑衣青年包圍，唔驚就假！

正所謂，冰凍三尺，非一日之寒。將軍澳青少年問題嚴重，治安惡劣，唔係今時今日嘅事，地區團體、區議員同立法會議員多年來不斷向官府反映，要求加強警力，維持治安，確保居民安全，點知當局唔係左耳聽右耳出，就係一日拖過一日，從來冇正視過。唔講唔知，人口已增加到四十萬嘅將軍澳，到依家仲未有獨立警區，維持治安嘅捕快要由總區或其他警區借調，喺咁嘅情況下，將軍澳治安又點可能好吖。

計太一叮話齋，除咗警力不足，社區設施缺乏，亦係衍生青少年問題嘅主要原因。將軍澳屬新發展區，區內六分一人口係十八歲以下青少年，但係當局規劃嘅時候，淨係諗住點樣賣地，點樣起樓，點樣收錢，根本冇考慮其他配套，搞到社區設施嚴重不足，青少年無所事事，又缺乏正當、健康嘅活動場所，有乜法子唔搞事吖。有社工警告，如果當局仲唔增撥資源及人手，改善社區管理模式，尤其喺場地設施上配合青少年人口發展，童黨問題只會愈來愈惡化嘅咋。

古人話，後生可畏。其實後生可唔可畏，完全視乎官府有無作為，如果教育成功，青少年有積極正確嘅人生觀，根本唔會產生所謂童黨問題，弊就弊在香港唔只教育政策失敗，連青少年政策亦一塌糊塗，後生唔可畏至奇喇，叮！