排隊又熱又餓 派錢玩殘長者

尋日朝早，本港出現一個奇景，就係周街有公公婆婆排隊，情況相當壯觀。盂蘭節派米都過咗啦，更加唔係端午節派糉，到底發生乜嘢事？哦，原來港府派錢開始分階段接受登記，於是有大批長者排隊遞交申領表格，逼爆大小銀行同郵局。

最諷刺嘅係，天文台尋日發出酷熱天氣警告，路邊監測站錄得空氣污染水平甚高，環保署呼籲長者「減少體力消耗同戶外活動，同埋避免長時間喺交通繁忙街道逗留」。但係由於派錢安排麻煩，長者被迫出街排隊交表。政府一次過犯齊晒所有禁忌，你話係咪玩殘班老人家吖？

港府派錢捨易取難，一句保障私隱就要全民登記，砌詞狡辯叫市民透過網上登記，毋須排隊喎。銀行門口長者人龍鬼咁長，證明港府又計錯數。喂，試問有幾多老人家識上網呀？加上長者一般攞錢心切，港府即係焗長者受折騰之苦。

嗱，行動不便嘅雷婆婆，六點幾就出門，同丈夫喺銀行門外排咗近兩粒鐘，佢嘅感受真係一字一淚：「成八十歲人，畀六千蚊搞搞震！又口渴，又肚餓，好辛苦！」雷婆婆話，攞六千蚊作膳食費。其實，老人家若然氣虛體弱，捱完尋日一役都分分鐘冇咗半條人命啦，食龍肉都未必補得番！

七老八十被罰企，本來已經係苦差，仲要係天時暑熱，企喺街邊吸塵，絕對唔係講玩o架。大汗疊細汗、捱飢抵餓、企到腰痠背痛，呢啲都預咗咯，萬一因為空氣翳焗，有人頂唔順暈低，咁就大件事，到時官府裏面嘅老爺奶奶肯定受盡千夫所指。

派錢措施變虐老政策，攞錢隨時搵命博。太一叮唔係講笑o架，真係有老人家為咗出街排隊交表，搞到差啲連命仔都無埋。黃伯為咗攞呢六千蚊，尋日專程山長水遠由觀塘搭車去旺角亞皆老街滙豐銀行交表。之後佢喺條街行行吓，一輛貨車突然失控翻側，車斗上逾噸重磚頭散落，途人梗係雞飛狗走啦，其中推着手推車嘅運魚工人走避時，車上嘅大水桶翻倒猛撞黃伯腳部，搞到黃伯要入院治理。

黃伯被迫出街交表，遇車禍險枉死，執番條命算還得神落，但萬一又有老人家遇上類似意外，咁就好難講囉。如果港府唔想搞出人命，即刻取消排隊交表呢種虐老政策啦，叮！