懶官一味等收工 行人隧道無影蹤

香港空氣質素惡劣，係人都知，但如果要揀惡劣中嘅惡劣，大家又知唔知邊區呢？其實如果大家有留意環保署每日發布嘅空氣污染指數，就知道銅鑼灣污染指數經常爆燈，所以咯喎，講到空氣質素惡劣，銅鑼灣認咗第二，睇怕其他區都唔敢認第一。

銅鑼灣空氣質素點解咁惡劣？有好多原因嘅，最主要該區係商業中心，購物地帶，人多車多舖頭多，由朝到晚人頭湧湧，沙塵滾滾，空氣唔惡劣至奇喇。呢，港府一早就話要改善銅鑼灣環境，計劃興建行人隧道，將幾條繁忙街道連接起嚟，減少路面人流，避免人車爭路喎。

呢個計劃聽起嚟確係唔錯，全長一公里嘅行人隧道分為三段，由維多利亞公園通到跑馬地咁滯，建成之後，人有人行，車有車行，行人唔使食汽車廢氣，汽車亦唔使畀行人擋路，成個銅鑼灣面目一新，空氣都清新啲喇。可惜吖，計劃就有喇，但幾時成事呢？你唔知，我唔知，連港府自己都唔知。

嗱，運輸署舊年九月已完成銅鑼灣行人隧道及相關交通改善措施嘅研究，然後由路政署接棒，請顧問公司進行技術可行性研究，打算今年八月諮詢公眾。即係話，港府用咗整整一年時間閉門造車，紙上談兵，依家仲係十畫未有一撇。

照計呢，當局研究咗咁耐，點都應該有個初步方案喇啩。唉，如果你真係咁諗，你就錯晒喇。正如區議員話齋，幾時起好條隧道？要幾多錢？工程影響有幾大？呢啲必須嘅資料一律欠奉，路政署一味吹水，如果到時變成一條鬼祟隧道，治安等問題一大堆，點支持吖！

叮，起條行人隧道啫，又唔係乜嘢高難度工程，唔使填海，唔使封路，唔使拆遷，唔使賠償，使唔使研究咁耐吖？不過講開又講，港府做嘢不嬲都係咁嘅喇，大事又好，小事又好，大工程又好，小工程又好，例牌研究又研究，諮詢復諮詢，而且經常有頭冇尾，好似董建華嘅八萬五咁，唔再提起就表示唔存在添。呢，海濱長廊係咁，單車徑亦係咁，講咗幾年仲係無影無蹤，睇嚟銅鑼灣行人隧道大計可能都係同一命運嘅咋。

無他嘅，跛腳鴨政府得過且過，成班高官一心一意等收工，邊度仲有心機做嘢吖。總而言之，一味採取拖字訣，拖拖吓好快就夠鐘走人，關人個關囉！