泳池餐廳養曱甴 長期空置太敗家

泳季又到喇！夏日炎炎，若然可以碧波暢泳一番就梗係爽啦。不過，欺山莫欺水，玩還玩，記緊安全至上呀，尤其係去政府轄下嘅公眾泳池游水，更加要執生！

大家放心，唔係紅蟲之患重現，亦唔係發現咗令泳客聞之作嘔嘅泳池糞便，公眾泳池理論上仍然係安心暢泳嘅地方。之不過咁，本報記者發現，本港泳池驚現另一管理問題，就係裏面嘅餐廳好多丟空荒置，造成資源嚴重浪費。同紅蟲嚇人、糞便襲人一樣，都涉及康文署管理失當。

泳池餐廳長期空置，泳客至少有兩筆帳要同康文署算。首先，泳客都係納稅人，政府設施長期空置造成浪費，已經足以興師問罪。唔講唔知，全港三十八個公眾泳池，其中三十個預留咗餐廳位置，但記者巡查發現，只有十間有人經營，其他唔係丟空養老鼠曱甴，就係淪為雜物房。就算有人多次求租，康文署都以呢樣嗰樣理由拒絕，簡直揼錢落鹹水海。

有冇敗家啲呀？樓價超越九七，香港寸金尺土，泳池餐廳竟然攞嚟放雜物？係呀，好似深水埗公園同荔枝角公園嘅泳池餐廳咁，外圍至今被白布圍封，裏面只係存放桌椅同雜物。李鄭屋邨泳池餐廳就改建成救生員休息室兼晾衫房。庫房水浸啫，都唔使咁浪費、咁折墮吖？二十間泳池餐廳閒置，以每間月租四千元計算，政府一年少收近一百萬元。港府平日對扶助基層斤斤計較，浪費公帑就動輒百萬，你話係咪豈有此理吖！

其實，審計署報告唔止一次揭發政府物業及設施長期空置㗎嘞，變身曱甴樂園嘅物業，商廈單位又有，法院小食亭又有。呢嗱，本報上年底踢爆食環署轄下油尖旺三個街市多年空置，就足足浪費共七萬平方呎公共空間。依家連康文署都懶懶閒，泳池餐廳亦被閒置，睇嚟官僚浪費無分彼此，敗家仔齊齊敗身家！

餐廳長期空置，泳客第二筆要同康文署算嘅帳係：喂，今時今日咁嘅服務態度點得㗎！市民游完水無餐廳醫肚，固之然掃興兼唔方便，最緊要係教練教落，空肚游水好易抽筋或者頭暈，萬一泳客入到泳池先至醒起未食嘢咁點算呀？空肚落水，一旦出事，康文署難辭其咎呀！所以咯喎，港產官僚講以民為本，只係吹水㗎咋，各位泳客咪當真呀，都係自己執生啦。

總之，泳池餐廳長期空置就係敗家行動。學立法會議員話齋，餐廳唔出租，畀社企行善夠好啦，好過養曱甴吖，叮！