西九總裁又洋人 外來和尚唸番經

西九文化區管理局前行政總裁謝卓飛早前突然劈炮，港府大鑼大鼓全球揀蟀，尋日終於正式揭盅，澳洲人Michael Lynch雀屏中選，獲聘出任西九新掌門人，聽講年薪達五百萬元，高過前任多多聲，真係名副其實嘅筍工。

身兼西九管理局主席嘅政務司司長唐英年例牌王婆賣瓜，大讚新總裁有超過三十年藝術範疇嘅經驗，擁有廣泛人脈網絡，相信西九文化區喺佢帶領下，可以成為世界級藝術中心咁話。叮，上次聘請謝卓飛，唐唐咪又係讚到佢天上有地下冇，結果嗰位天上有地下冇嘅洋總裁做咗五個月就不辭而別，成為國際大笑話，唐唐啱啱先至畀人摑咗一巴，咁快就唔記得喇！

西九總裁搵嚟搵去都係洋人，睇嚟港府確實認為外來和尚好唸經。咁就奇喇，唔通中國人真係冇能力做好呢份工？唔通香港真係搵唔到藝術人才？

其實，正如鄧伯伯話齋，不管白貓黑貓，會捉老鼠就係好貓，西九總裁係乜嘢人唔係問題，最緊要物有所值，納稅人嘅錢用得其所。大家都知喇，西九文化區係香港十大建設之一，投資數以百億元計，行政總裁位高權重，舉足輕重，選人不當，丟架事小，經濟損失事大吖！

冇錯，論資歷，呢位新總裁先後喺澳洲及英國多個藝術機構做過，經驗及能力唔需要懷疑。不過咁，各處鄉村各處例，外國有外國嘅情況，香港有香港嘅環境，唔可以相提並論o架，如果將外國嗰套經驗照搬嚟香港，會唔會出現水土不服，會唔會南橘北枳，真係冇人知。香港講到底都係中國人嘅社會，要管好西九文化區，一定要熟悉中國文化及本地環境，唔知呢位洋總裁對中國文化知道幾多，對香港情況又了解幾多呢？

嗱，當日謝卓飛新官上任時曾經誇誇其談，講到天花龍鳳，結果一事無成，自動消失。有人質疑，謝卓飛根本係文化「水土不服」，佢冇錯係有管理大型國際藝術中心嘅經驗，可惜對本港文化一無所知，好難帶動香港民間文化藝術發展。加上本港公營機構官僚十足，掣肘多多，幾好嘅人才都無用武之地喇。

講出嚟真係失禮死人，世界級藝術中心十畫未有一撇，但西九管理局成立後已經有六、七個高層辭職，再咁落去，西九遲早成為世界級笑話中心就真，叮！