產科告急亂陣腳　人口政策埋炸彈

內地孕婦湧港產子逼爆醫院產房，食衞局局長周一嶽早前臨急抱佛腳推出七招應對，可惜藥石亂投，搞到整個公私營分娩服務鏈好似突然穿咗羊水咁，亂晒大籠，再次證明周一嶽最叻都係幫上司擦鞋，其他冇瓣掂！

「周七招」仍在醞釀階段，但社會尤其係醫學界狠批之聲已不絕於耳。有關注團體踢爆，呢七項虛招不單止軟弱無力，無助解決內地孕婦湧港產子問題，反而令到本地大肚婆分娩服務告急，床位難求，港人未蒙其利，先受其害。

嗱，件事係咁嘅，自從周七招出台後，內地中介公司紛紛趕搭尾班車，鬥快安排內地孕婦到港霸床位，令產科檢查服務混亂一片。亂成點呢？一名港婦知道自己懷有一個月身孕，於是諗住搵間私家醫院準備預約產子啦，點知得到嘅答案竟然係：全院額滿！唔使問阿貴，呢啲顯然拜當局所賜，內地孕婦湧港潮變成海嘯淹沒私家醫院產房，唔通以後港女未懷孕就要去醫院撲定床位？好荒謬啫！叮！

其實，周七招根本係當局急就章炮製出來嘅怪物，未經深思熟慮，亂七八糟，正式係畸胎一個。未臨盆出世已經搞到陣腳大亂，關注團體指出嘅亂象，只係眾多後遺症嘅冰山一角咋，呢方面相信都唔使太一叮多費唇舌咯。

古人講得好：「寧未雨而綢繆，毋臨渴而掘井。」○一年，父母皆非港人而在港出生嘅嬰兒只有六百幾人，但係自當年莊豐源案後，呢類嬰兒年年飆升，到上年已經超過四萬人。面對內地孕婦湧港產子呢股洪潮，無論周七招或所謂八萬八封頂措施，最多只能暫時解決眼前危機，港府真正要應對嘅問題，其實係人口政策失控嘅計時炸彈。

人無遠慮，必有近憂。每年有四萬內地孕婦來港產子，十年就係四十萬人，呢班嬰孩自動擁有三粒星身份證，日後只要有一半甚至三分一人回流香港，教育、房屋、福利同醫療等勢必不勝負荷，亦即係話，今日內地孕婦湧港分娩導致產科爆煲，第日就係整個社會崩潰，唔係講笑㗎！港府至今仍然只係頭痛醫頭，腳痛醫腳，認真荒謬。

唔該港府快啲開動腦筋，諗吓點樣制訂長遠嘅人口政策喇，如果唔係，萬一到時又搞到好似倒瀉籮蟹，裙拉褲甩，咁就後悔莫及咯！叮！