太一叮：公院播惡菌 醫管局靠害

醫院係治病救人嘅地方，如果病人入去治唔到病，反而染到周身惡菌，咁就大吉利是囉。咪以為太一叮講笑呀，今時今日，呢種事真係隨時都可能發生㗎。

呢，上個月有位婆婆喺瑪麗醫院留醫期間無喇喇患上退伍軍人症，衞生防護中心化驗後先至知道，病菌就係來自該院嘅自來水。本應最講究衞生嘅醫院，居然淪為傳播惡菌嘅溫床，問你怕未。好彩呢位婆婆福大命大啫，否則後果真係不堪設想咯。

講開又講，退伍軍人症只係冰山一角㗎咋，殺入公立醫院嘅惡菌簡直多到數唔清，最得人驚係有種叫做鮑氏不動桿菌嘅惡菌，已變成超級抗藥品種，一旦唔好彩感染，幾乎無藥可醫。嗱，醫管局早前首次公布醫院內抗藥性金黃葡萄球菌嘅感染數據，七大醫院聯網中只有新界東、九龍東及港島西達標，律敦治醫院嘅惡菌入血比率甚至超標兩倍添。唔怪得有人話公立醫院靠害，真係冇講錯。

本報最近亦委託理工大學化驗醫管局轄下診所飲水機水質，發現部分樣本含菌量爆燈，以觀塘賽馬會健康院為例，每一百毫升飲用水就含有超過四百個細菌。

因乜事惡菌可以喺公立醫院打橫行？本報記者巡查咗多間公立醫院，發現衞生情況簡直惡劣到講都冇人信。好似聯合醫院咁，一入大堂就可以見到玻璃窗同地下布滿污迹，嗰個八達通拍卡機仲鑲晒黑邊添，一睇就知道好耐冇人清潔；廁所更加不堪入目，一地廁紙，污水橫流，發出陣陣惡臭。屯門醫院仲恐怖，急症室嘅洗手盆周邊發黑，滿地水漬，室內流動病床嘅床單亦布滿污迹，走廊扶手一片灰塵，用紙一抹，唔係慢慢變黑，而係立即變黑。

叮，醫院應該有人清潔㗎，點解會搞成咁？冇錯，係就係有人清潔，可惜求求其其、是是但但呢。好似律敦治醫院，廁所尿兜同洗手盆每日先至清潔一次，唔臭至奇喇。不過咁，都唔怪得晒清潔工人嘅，醫院人手唔夠，有啲病房足足住咗四十幾個病人，但只有一個外判工負責清潔，半粒鐘就要抹晒幾十張病床，咁搞法，有乜法子唔變成惡菌溫床吖！

講到尾，公立醫院衞生情況惡劣，惡菌橫行，皆因醫管局管理混亂，資源錯配。鬼咩，前線人手短缺，十個煲七個蓋，做到個個氣咳，衞生情況又點會好呀。計太一叮話齋，不如叫食衞局局長周一嶽去公立醫院大房住幾日，睇吓佢有乜嘢反應，叮！