關愛基金等爛尾　夕陽政府等收皮

港府做事一向虎頭蛇尾，想唔到，一出世已經半生不死嘅關愛基金，掌聲贏唔到，反而賺咗一大堆花名，繼被譏為「溺愛基金」、「關人基金」同「商界贖罪券」之後，最近又多咗兩個，叫「補鑊基金」同「爛尾基金」。港府呢個基金有幾古怪荒謬，由此可見一斑。叮！

關愛基金本意拾遺補漏，幫助社會福利網嘅漏網之魚，點知半年就變晒質，係就係補漏，不過係幫港府施政失誤甩漏補鑊，變咗高官有乜頭暈身興就攞嚟定驚嘅政治萬金油。預算案派錢雨露不均觸怒新移民咩，由基金補派喇，最低工資烏厘單刀搞到工人打爛飯碗咩，由基金派錢幫補喇，總之，派得快好世界，遮住港府嘅醜態。

搞笑嘅係，大把錢就話唔怕使啫，但係關愛基金要商界捐錢大計觸礁，竟然仲死雞撐飯蓋，呢樣夠晒核突吖嘛。根據港府嘅如意算盤，基金由商界認頭一半，即五十億元，可惜至今實收七億元都無，籌錢進展慘不忍睹。對於關愛基金募款食檸檬，立法會議員搵到一個啜核形容詞：「爛尾」。簡直言簡意賅一語中的。

嗱嗱嗱，曹操都有知心友，特衰政府一樣有超級粉絲，曾經話有信心幫基金募集三十五億元嘅香港總商會主席胡定旭話喎，相信政府帶頭注資五十億元之後，商界就會尾隨捐錢，言下之意，即係拍心口對基金籌足五十億元投下信任票。嘩，曾蔭權開到聲，商界都照托手（月爭），唔通胡定旭自認更巴閉？哈，夕陽政府跛腳鴨，煲呔曾硬食商界檸檬不足為奇，但如果淪落到連商會阿頭都不如，咁就真係不如返歸早抖咯。

醜婦終須見家翁，有關愛基金委員坦言，基金原意係透過官商民合作，紓緩社會仇富、仇商情緒，但依家商界認捐反應冷淡，原先目的已經落空，而籌募款項遠低於目標，可能影響基金長遠運作，所以整個計劃有需要重新檢討。亦有委員直指，若然立法會最終否決港府五十億元注資，基於政治理由，港府應該考慮叫停整項工作。唉，早知今日，何必當初，港府騎劫基金用心不良，依家演變成鬧劇一場，搬起石頭砸自己嘅腳，呢啲咪叫自食惡果囉。

其實，講到尾，港府募捐觸礁，根本就係咎由自取。關愛基金定位不清，目標不明，本已惹人詬病，令人晒頭，最離譜係做落明搵商界老襯，鈔票由人哋嚟付，扶貧功勞就自己攞晒，世上邊有咁嘅搵笨生意㗎？如果商界就範，何止等同納稅，簡直係默認以錢贖罪，捐錢愈多，代表原罪愈重，商界愈諗愈唔對路，煲呔曾叫捐錢？睬你都傻啦！胡定旭？更加唔使諗！叮！