樹木辦有將無兵 防冧樹有口無心

事實證明，樹木辦果然係實至名歸、如假包換嘅「廢柴辦」，而樹木係唔可以交畀廢柴管理嘅。

呢，話說連串塌樹事故之後，港府敲鑼打鼓成立樹木辦，主要職責之一就係巡查全港樹木，制訂問題樹木名冊。之但係，問題樹木名冊喺舊年七月草草制訂後，直到上星期至首次更新，前後隔咗成十個月。「十年樹木」大家聽得多，「十月驗木」就真係聞所未聞，可以話係廢到冇朋友嗰隻，難怪有人批評樹木辦「有將無兵」，人手不足，效率奇低。

港府驗樹懶懶閒，民間只好自救。有政黨自發成立樹木義工隊，喺短短幾個月內收到六十幾宗投訴，並於上月主動巡查約一百棵樹木，發現超過一成出現腐爛、傾斜、蟲蛀等問題，大部分位處公共屋邨，即使搖搖欲墜，依然冇人處理，為免傷及路人，義工隊已將有關個案轉交港府處理。

計太一叮話齋，義工隊主動出擊驗樹，固然有助查出危險樹木，但有關個案轉交官府後，會唔會得到及時處理又係另一回事。你知啦，港府表面上有好多管樹部門，但實際上就係多老母等於冇老母，多人管等於冇人管。最經典係舊年年中，有村民發現大埔荔枝山村路邊一棵細葉榕有幾百條毛蟲，於是向政府求助，結果警方推向食環署，食環署推向康文署，康文署推向路政署，路政署推向地政總署，五個衙門推足成日，始終冇人出手處理。

查實，早喺港府建議成立樹木辦時，本報已經指出，香港嘅管樹部門唔係唔夠，而係太多。之所以頻頻發生冧樹事件，主要係因為唔同部門互相卸責，互相交波，對危險樹木闊佬懶理。呢種官僚作風一日唔改，成立樹木辦只係進一步疊床架屋。講到底，樹木辦有將無兵仲係其次，最大嘅問題係港府預防冧樹有口無心至真，叮！

好笑嘅係，港府應斬嘅唔斬，唔應斬嘅亂斬，每次發生塌樹事故後，佢哋總會大開殺戒，展開斬樹行動，將唔少有得救嘅病樹亂斬一通。官員管樹不力唔使問責，反而由無辜樹木承擔後果，真係令人大開眼界。計太一叮話齋，最迫切需要斬除嘅其實唔係樹木，而係毫無建樹嘅樹木辦同管樹官僚，免得喺度篤眼篤鼻嘥公帑啦。

講真吖，只要當局畀多幾錢肉緊，各個部門行多幾步，預防冧樹根本唔難。咪話太一叮唔提醒，風雨季節即將來臨，又係塌樹高危期，好心啲官員打醒十二分精神啦，冇人想見到慘劇重演o架，叮！