打擊毒駕誠可喜 醉駕害人須嚴懲

港府禁毒口號：「生命無take 2！」真係講得好啱o架，尤其嗰啲迷幻司機玩毒駕，唔止自己玩命，更加罔顧人命，絕對唔可以放過。所以，政府要加重罰則打擊毒駕，太一叮舉腳贊成，寄望一take過杜絕毒駕，唔使再NG！

點解太一叮對毒駕深惡痛絕？相信都唔使多講嘞，本港近年毒駕事故頻生，迷幻司機喺公路橫衝直撞，簡直搵人命較飛，同內地奸商出售黑心食品害人一樣係為禍蒼生。嗱，今年初，一名貨車司機懷疑索K上腦，駕車駛入青衣油站後高速猛衝，撞爛晒站內嘅防撞裝置，差半呎就直剷加油機，險釀大禍。

毒後駕駛固然形同玩命，最攞命係無辜乘客隨時陪葬，試過有綠巴司機High完嘢後開工揸車，竟然光天化日喺跑馬地鬧市舞龍一公里，十幾個乘客嚇到半死跳車逃亡，最後綠巴要撼到路邊房車先至停止飄移。毒駕成風，乘客防不勝防，唔通每次都睇吓司機個鼻哥窿有冇白色粉末先至上車咩？

開講有話「治亂世，用重典」。毒駕、藥駕作亂多年，港府終於向輿論低頭，決定提高罪行罰則，首次定罪者除可被罰二萬五千元及監禁三年外，更會被停牌不少於五年，再犯者停牌不少於十年。為加強阻嚇，草案更建議法庭可視乎案情判處重犯者終身停牌。有關修例今日刊憲。

港府近年無乜好事做過，今次就做啱嘞，就算係踢一踢、郁一郁，都叫肯轉身補鑊吖。雖然有運輸業人士覺得刑罰過於嚴苛，認為如果判處司機終身停牌等如將職業生涯判處極刑，之不過咁，鬼叫你濫藥索K咩？明知成車乘客性命喺你手上仲要以身試毒，終身停牌已經執到啦，唔判終身監禁咪算大發慈悲囉！

嗱，港府平日膽小勢弱，今次咪話太一叮唔撐你呀。不過，前車可鑑，基於高官過往經常有頭威無尾陣，政府部門又執法粗疏得過且過，太一叮都係要提醒一句，鐵腕打擊毒駕方向固然正確，但係到執法時更加要貫徹落實。有法必依，執法必嚴，否則，又係有法等如無法o架咋！

講開又講吖，毒駕要杜絕，其實，醉駕咪一樣咁危險，一樣要提高刑罰打擊。唔係咩，港府上年底加重醉駕刑罰之後，首犯者會被罰停牌最少兩年，重犯者最少五年，但係醉駕意外依然無日無之，最近更加接二連三有藝人以身試法，反映現行罰則根本未夠阻嚇性。唔好唔記得，以前醉駕造成嘅意外慘劇比毒駕更多，所以，計太一叮話齋，為保障其他道路使用者安全，重典一樣要刑上醉駕者。叮！