笨官僚自廢武功 膠袋稅隨時爛尾

爛尾政府盛產爛尾政策，呢嗱，繼關愛基金之後，膠袋稅隨時又淪為另一個爛尾政策嘞。

膠袋稅實施咗近兩年，消息傳出，當局有意將徵費範圍由現時嘅大型超市、便利店同連鎖零售店，擴大至全港所有零售商舖，之但係，就會倒退式取消徵費須上繳政府庫房嘅做法，即係膠袋稅以後由商戶自己袋。

你話負責膠袋稅簡稱「膠官」嘅官員係咪戇居吖？膠袋稅推行近兩年，社會開始適應習慣之際，突然又話撤銷上繳機制，呢鋪實世界大亂都有之。市民第一個反應就係質問：錢不入庫房，仲點可以稱之為稅，稱之為政府徵費？錢落商戶袋，咪即係變相向商舖進貢，明益商家？政府搞官商勾結，唔使咁明刀明槍吓話？

正所謂名不正則言不順，膠袋稅一旦失去政府徵納嘅意義，就會名存實亡。道理一字咁淺，當初立法強推膠袋稅，就係要迫令商舖向顧客收費，從而達到減用膠袋嘅目的，依家商舖毋須向政府交數，即係回復無王管狀態。商舖眼向錢看，一切營運從生意角度出發，膠袋稅就會隨時淪為商人隨心所欲嘅招客手法。

舉個例子，深水埗一條橫街有兩間雜貨舖，其中一間夏日酬賓，街坊幫襯夠十蚊就免收五毫子膠袋稅，變相減價吸客，你估另一間會唔會即刻跟隨吖嗱？再過多兩日，隔籬兩條街嘅雜貨舖又會唔會加入競爭行列？仲有，一位嬸嬸去海味舖買咗萬幾蚊參茸，畀錢前叫老闆送兩個膠袋使吓，你估老闆會唔會托手（月爭）？

一句講晒，開得舖頭做生意嘅，梗係利字行先，如果膠袋徵費靠商戶自律做得到，當初就唔使立法啦，各位膠官！

消息透露，當局諗出膠袋稅免上繳屎橋，皆因想節省大筆行政費用喎。無錯，慳錢係緊要，不過都要分輕重㗎，政策搞到唔湯唔水，甚至走回頭路，慳到再多錢都係枉然。正如環保團體指出，當局日後再難監察商舖有否收稅，等同自廢武功。更有立法會議員批評，膠袋稅形同虛設，當局不如索性擱置整項徵費計劃啦，咁就乾手淨腳，一分錢都唔使出添呀！

唉，港府搞環保政策，幾乎掂邊瓣衰邊瓣，停車熄匙、慳電膽、擴建堆填區等等，樣樣搞到唔湯唔水，依家連膠袋稅都隨時壽終正寢。香港要減廢，睇嚟先裁減咗啲至廢官僚先啦。叮！