特區之首也僭建 違法權貴賤鬥賤

該煨咯該煨！醜怪咯醜怪！家陣連特區之首都係目無法紀嘅犯罪分子，香港仲有乜資格自稱法治之區呀？如果所有違法之徒一字排開接受叮你鎯鎯大懲小戒，太一叮真係怕叮到手仔軟！

香港最近捲起一場僭建風暴，本來被揭發視法規如無物嘅係新界鄉紳，點不知星星之火極速燎原，醜聞一單接一單大白於天下，僭建業主居然包括官場大老爺以及政壇偽君子，知法犯法簡直前仆後繼。立法會議員接二連三家醜外揚之後，輪到環境局副局長潘潔，仲有教育局局長孫明揚。你以為僭建業主嘅官階見頂啦，哈，本報記者再踢爆一單終極醜聞：曾蔭權祖屋也僭建！

喂喂喂，好心煲呔曾砌詞狡辯都唔好講到咁低B吖，佢話喎，當年屋宇署冇要求佢處理密封露台嘅玻璃窗，所以直覺上認為冇問題。法治之區乜原來係講直覺而唔係講法律嘅咩？如果屋宇署冇執法就等於冇問題，咁太一叮問問你，你隨地吐痰甚至通街便溺而食環署唔知點解又冇票控你，咁係咪等於冇問題呀？唔好玩啦，特區之首，直覺呢家嘢好虛無縹緲㗎咋，太一叮夠直覺下期六合彩頭獎得主係自己啦，然後買一幢不必僭建都空間寬敞嘅超級豪宅，親身示範奉公守法都可以安居樂業，爽呀！

唉，成日都話賤物鬥窮人，呢鋪變咗權貴賤鬥賤。唔係咩？全世界睇怕只有港式土著會咁為賤最樂，新界鄉紳違法違得毫無悔意，居然聲大夾惡要求「僭建合法化」。官場政壇更加係違法權貴俱樂部，僭建成風樂此不疲搞到管治威信徹底破產。人人改姓周，寶號周紳士，周身屎無處不在嘅唯一好處只係，本來負責監察政府嘅尊貴議員由於理虧，所以變得噤若寒蟬唔敢一如既往向醜聞主角窮追猛打要求引咎辭職，怕剃人頭者人亦剃其頭吖嘛，政府總部同立法會先至冇出現大量空櫈咋！

叮叮叮叮叮！法治之區瀕臨失控，點算好呢？計太一叮話齋，曾蔭權有必要下詔罪己，先公開道歉，再戴罪立功。即係話，下令全面清拆僭建物，包括自拆曾氏祖屋嘅密封露台。萬一發現問責班子仲有邊鬼個僭建，由曾蔭權帶頭全體扣減一個月薪金捐畀關愛基金當贖罪。唔好唔記得關愛基金有機會爛尾，捐得一蚊得一蚊，斷估煲呔曾唔想管治威信超額破產啩！