炮彈飛轆又殺人 防範意外極兒戲

車轆輾死人大家聽得多嘞，飛轆攞命唔知聽過未？元朗有個貨櫃場前日就發生炮彈飛轆事件，攞咗兩條人命。

當時兩名工人維修一架俗稱「大象」嘅吊運貨櫃起重車，啱啱用千斤頂將車身唧起，想將車轆拆落嚟，但扭鬆螺絲之後車轆就好似炮彈咁飛出嚟，兩人閃唔切，一個被撞到肚破腸流，當場冇命，另一個被撞到眼鼻都出血，Call白車送院救唔番。

原來佢哋換轆嘅時候，有個壓縮空氣鼓懷疑金屬疲勞損毀漏氣，射出強大氣流，推動三百磅重嘅車轆飛出，衝擊力有七百幾磅咁多，直情勁過炮彈，殺傷力非同小可。

可憐兩個工人年紀輕輕，其中一個只有十九歲，啱啱同有咗身孕嘅女友結婚，家陣話走就走，剩低孤兒寡婦，連辦後事嘅錢都冇。好在東方日報慈善基金撥出兩萬蚊殮葬費，先至解燃眉之急。

換車轆都會死人！真係聽見都毛管戙。其實，飛轆殺人喺本港已經唔係第一次，過去八個月就一共發生過四宗，造成四死三傷。

本來呢種悲劇係可以避免嘅，業界有安全指引，拆車轆嘅時候要先將輪胎嘅氣放晒，殺傷力就會減少。但係有啲人貪快怕麻煩，未放氣就鬆螺絲。大佬，生命冇Take Two，唔講得笑o架。

工人違規操作固然要負責任，但係政府更難辭其咎。唔講真係唔知，原來勞工處對工業意外嘅防範兒戲到極。有貨櫃車運輸業人士踢爆，維修「大象」等大型車輛需要一定專業技術，但技工居然唔使領牌，阿貓阿狗都可以做。不幸出咗事，當局本應公布調查結果，令業界引以為戒，但勞工處連咁簡單嘅事都唔做，你話係咪靠害吖？叮！

飛轆殺人只係冰山一角，本港嘅工業意外五花八門無奇不有。例如，前年九月西九龍環球貿易廣場發生升降機墮落事故，當時六名清潔工人喺三十樓嘅升降機平台清理雜物，點知升降機忽然直插槽底，六個人全部死亡，你話幾恐怖。

政府例牌賊過興兵，煲呔曾話喎：工業意外一次都嫌多。點知講完就算，乜都冇做，工業意外就愈嚟愈多。呢，港大有項調查顯示，本港嘅工業意外傷亡率比日本、韓國高五至十倍。

港府高官成日吹水唔抹嘴，話香港係乜乜中心、物物之都。呢，家陣又多咗一個頭銜嘞，如果評「亞洲工業意外之都」，香港認第二，邊個夠膽認第一呀？叮佢個鎯鎯！