幸福指數大落後 皆因港府太窩囊

「香港人幸福嗎？」如果你唔識答，或者為口奔馳忙到無時間思考呢條問題，不如睇吓中國社會科學院嘅最新報告吖，不過，要有心理準備至好，事關睇完之後包你心噏到笑唔出。

社科院公布中國城市競爭力藍皮書，直指香港正被內地城市迎頭趕上，雖然綜合競爭力蟬聯第一，但係優勢不斷收窄，競爭力每況愈下，其中經濟效率輸畀台北，經濟規模不及上海，產業層面不敵北京，科技競爭力更加十大不入，一句講晒，逆水行舟，不進則退，香港正不斷被競爭對手爬頭。

忠言逆耳，社科院直指香港當前隱憂重重，包括經濟轉型緩慢，以致出現有經濟增長而無發展嘅怪現象；科技同基建發展停滯不前，以及貧富差距大，引致社會出現不和諧因素等。嗱，洋奴漢奸就話惡意唱衰香港啫，社科院以事論事，點破香港問題多籮籮，港府無得賴嘞啩。

唉，回歸前，香港生機勃勃，東方之珠璀璨耀目；回歸後，優勢漸退，黯然失色。香港由生金蛋嘅肥鵝變成跛腳鴨，本來已經叫人神傷，更可悲嘅係，藍皮書公布嘅城市幸福感指數排名，作為國際金融中心嘅香港竟然排名第二百七十一，幾乎包尾咁滯。社科院毫不客氣直指情況與香港嘅經濟發展不相符，即係話，連佢哋都唔明香港人嘅幸福感指數點解會低成咁。

其實，呢個問題最好走去問特區政府，如果佢哋唔好意思答，就等太一叮代勞為社科院解疑釋惑喇。香港人嘅幸福指數插水，理由好簡單，就係拜特衰政府所賜囉！回歸十四年，港府管治一塌糊塗，董建華八年之亂固然一無是處，曾蔭權治下呢六年更加烏煙瘴氣。樓價失控束手無策，貧富懸殊闊佬懶理，就連預算案派錢都派到天怒人怨，有咁窩囊無能嘅政府，試問港人點會快樂？幸福又從何談起？

正如學者所言，香港依家靠食老本吊命，最怕坐食山崩，綜合競爭力第一呢個排名好快就保唔住o架嘞。社科院指出嘅香港隱憂其實已存在多年，但係問題無改善，反而仲不斷惡化。就講基建吖，拖拉多時嘅港珠澳大橋本來已經開工，點知被人以司法覆核叫停，搞到連沙中線嘅環評報告都要撤回，再咁搞落去，香港沉淪，絕非危言聳聽o架。

人生在世就係追求幸福，但係好不幸，有個咁窩囊嘅港府，香港人真係難言幸福。不如咁啦，中央政府幫幫手換走晒班特區庸官，咁樣香港人嘅幸福感指數就會即刻掉頭飆升，甚至隨時爆燈添！叮！