打僭建口硬手軟　林鄭改名唔打得

僭建風暴一發不可收拾，連特區之首曾蔭權都捲入醜聞，曾氏祖屋被本報揭發違規用玻璃窗圍封露台，全港嘩然，全城鬧爆，成為特區權貴「僭建聯」嘅最高象徵人物。

煲呔曾麾下一眾幕僚同樣知法犯法，呢套僭建聯治港班子名單好長o架，有孫明揚、潘潔，仲有新加盟嘅唐英年、林瑞麟同行會成員梁智鴻。好一場僭建大風暴，將偽善官場吹得七零八落，高官虛假面目原形畢露，仲包括咗發展局局長林鄭月娥。

大家咪誤會，林鄭唔係學咗孫公孫明揚，身為打擊僭建最高統帥反而私下違規，佢嘅虛偽係打擊僭建表裏不一口硬手軟。

林鄭月娥咪被形容為「好打得」嘅，原來佢吹水仲得呀。面對僭建痼疾杜之不絕，林鄭早輪口口聲聲話嚴打，乜嘢擴大執法，乜嘢迅速行動，吹到天花亂墜，人人信以為真，點知原來全部都係吹水唔抹嘴。

嗱，屋宇署嘅最新數據顯示，今年四月發出嘅僭建物清拆令只有一千一百幾張，只及去年同期嘅一半，同前年五千幾張更加冇得比；勸喻信亦少得可憐，只係發出百幾張，遠低於去年同期嘅近六百張。檢控方面發出近二百張傳票，略高於去年同期嘅百幾張，但少過前年同期嘅三百幾張。

有冇搞錯呀？一路話嚴打，一路執法就放軟手腳，有立法會議員批評，林鄭月娥講一套做一套，簡直一語中的。不如咁諗吖，若然深圳公安阿頭宣布嚴打掃黃，但係暗中就將掃黃隊調晒去捉小販，以前每月執法掃場十次，依家變成初一十五例行公事，咁嘅嚴打行動，唔好話一般老百姓懷疑，流鶯野雞扯皮條都唔信啦！叮！

奇嘞，奇嘞，林鄭平日形象硬淨、行事幹練，乜解究打擊僭建手軟腳軟、推三阻四呢？曾經被當局勒令清拆僭建物嘅市區小業主難免會問：係咪明知頂頭老闆煲呔曾以及官場同僚都係案中重犯，所以放軟手腳玩放生呀？定係不堪政治壓力腳軟跪低先？

如果唔係，全港市民就會諗嘞：原來，林鄭月娥只係對住「強拍」小業主好打得㗎咋，對住高官議員鄉紳權貴就腳都軟埋，睇嚟以後要改名「唔打得」囉。

面對群情洶湧，曾蔭權尋晚出稿話會盡快清拆僭建物。所以話啫，民意不可欺，「好打得」唔代表「乜都得」，口是心非愚弄民意，案情同權貴僭建一樣嚴重o架，林鄭好自為之呀！叮！