產子潮截無可截 減收症弄巧反拙

內地孕婦湧港產子逼爆公立醫院婦產科,但係一眾高官庸醫束手無策。呢,港府早輪咪拋咗個「八萬八」上限指標出嚟嘅,要求全港醫院由下年起嚴格控制接收孕婦數量,卒之碰到一鼻子灰,私家醫院至今仍然擺出一副睬你都傻嘅姿態,「八萬八」大計隨時難產。

港府要求私院收症封頂遇阻,咁點算呢?惟有寄望向公立醫院埋手囉。據聞,公立醫院正醞釀大幅削減下年接收內地大肚婆名額,數目會由上年約一萬人,減至三千幾人。食衞局、衞生署同醫管局尋日開完內部會議後,局長周一嶽證實商討減收限額,但具體數字秘而不宣,話延至六月中公布。

如果話中國文化係醬缸文化,咁港產官僚就係一隻超級大醬缸——簡直超級混帳。呢頭誇誇其談話要發展醫療產業,嗰頭對內地孕婦財神爺關門趕客,何止自相矛盾,簡直自摑嘴巴。好嘞,港府眼高手低欠缺規劃,依家問題湧現,為求文過飾非,就將責任推諸內地孕婦身上,當成洪水猛獸一樣避之唯恐不及。你話香港醫療體系被班咁嘅醫療庸官管治,有乜辦法唔冇病變有病,小病變大病?

話時話,公立醫院對內地孕婦截龍,根本係頭痛醫頭,腳痛醫腳,病源未清,病情只會繼續惡化。依家嘅情況,同家計會當年鼓吹節育嘅廣告名曲僅一字之差:截得到都未必好,截唔到盞生壞肚!

點解呢?道理好簡單,公立醫院落閘截龍,就算成功減收內地大肚婆,都唔代表本港產科嘅爆煲危機解除,事關內地孕婦洪潮勢必轉而湧向私家市場。私院來者不拒多多益善,到醫護人手應接不暇,最後咪又係向公立醫院挖角。到時醫管局醫護人員大逃亡,產房人手買少見少,唔止醫護做到氣咳,成個公營醫療體系產科服務瓜得!

截龍失敗又點呢?所謂:你有張良計,我有過牆梯。內地孕婦唔可以預約生仔啫,但係可以臨盆一刻衝入急症室分娩㗎嘛,基於人道理由,公立醫院無得拒絕。呢嗱,醫管局公布,公立醫院宣布今年停收內地孕婦之後,內地孕婦向急症室衝閘求診個案急速上升。今年首四個月以呢種特殊方式出世嘅嬰兒有三百一十幾名,比上年同期嘅二百零六名大增五成二。產科少收咗內地孕婦,但急症室分娩個案急增,隨時得不償失。

咁又何解話會生壞肚呢?皆因孕婦臨盆先至去急症室分娩係高危動作,對媽咪同嬰兒都存在風險,係唔值得鼓勵嘅。唉,港府藥石亂投,內地孕婦為幫嬰兒求得一紙香港出生證明書,分分鐘要鋌而走險。今次真係多得班香港庸官唔少,叮!