市面充斥毒玩具 把關輕率害兒童

簡直兒戲！本港塑膠幼兒玩具發現有害環境激素，呢類物質可以影響兒童生殖系統發育，早已被歐盟禁用，但喺香港就無王管，反映港府嘅監管工作兒戲過細路仔玩泥沙。叮！

綠色和平抽查香港、北京、上海同廣州四地三十份塑膠幼兒玩具及用品，結果廿一份驗出含環境激素「鄰苯二甲酸酯」。而從香港市面買到嘅十個樣本，就有六個超標，其中一個樣本嘅濃度含量更加高近三成，由此推算，本港大部分產品都有問題。

首先講講鄰苯二甲酸酯到底係乜東東芫荽葱先啦，簡單嚟講，就係一種塑膠工業軟化劑，具有雌性賀爾蒙作用，會令男性不育，增加女性患乳癌機會，幼兒長期接觸更加會影響生殖系統發育。玩具含有環境激素，幼兒等如日夜與毒為伴。大家都知啦，幾歲大嘅幼兒未懂性，乜嘢都鍾意擺入口咬一餐，而且生殖系統正處於發育期，中招機會更大，危害遺禍更深。

嘩，乜咁嘅有害物質都可以攞嚟製造玩具嘅咩？事實係歐盟早喺十二年前，已經禁止幼兒產品使用鄰苯二甲酸酯，美國亦有嚴格監管，只係港府把關輕率，所以先至形成「毒玩具」充斥市面。正如綠色和平指出，現時香港針對兒童玩具及產品安全嘅條例，對大部分有害環境激素嘅監管根本隻字不提，近乎完全無王管，令香港下一代嘅成長潛伏危機。

唉，懷胎十月，棉乾絮濕，每個BB都係父母嘅心肝椗，任何潛在風險都會令人提心吊膽。港府雖然難搵一個父母官啫，不過，港府官員好多都為人父母，或者仔大女大結婚生兒育女，為己為人唔該盡快正視問題，堵塞法例漏洞，咪再唔嗲唔吊、闊佬懶理，令全港幼兒家長擔心嘞。叮！

講開又講，港府對市民健康安全把關不力，監管制度落後過人，又豈止毒玩具一樣吖？空氣污染影響人體健康，但當局監測空氣污染嘅指數，比世衞或歐盟就落後咗廿幾年，所謂監測根本係自欺欺人；內地嚴禁電子廢物進口，但香港至今仍未立法規管；台灣對食品三聚氰胺含量「零」容忍，香港則容許低於每公斤二點五毫克；仲有呀，連蔬菜含鉛量嘅寬限都高過內地二十九倍，唔通香港人條命賤啲嘅？

年前網上流行一首打油詩叫「繽紛香港」，係咁講嘅：「起身一杯三胺奶，出街濁氣索個夠；午餐兩片硝基肉，叫碟含鉛大力菜；晚餐蒸魚要走青，孔雀石綠夠晒色！」睇嚟以後要加多兩句：瞓前仔仔食激素，多得政府好帶挈！叮！