漠視民意加車稅 群情洶湧先知衰

港府高官做嘢方式都幾騎呢，無論推出乜嘢政策都係閉門造車，仲自以為十全十美，唔理市民意見一味硬銷，搞到全人類媽媽聲，立法會否決先至死死氣認衰。堆填區擴建係咁，財政預算案派錢又係咁，鋪鋪都搞到一鑊泡。

太一叮諗極都唔明，佢哋點解唔可以事前聽吓市民嘅意見，將個政策定得周全啲呢？點解一定要群情洶湧鬧餐懵先至跪低？唔通做官真係大晒，市民都係阿斗？叮！

嗱，政府又喺度打倒昨日嘅我嘞，日前宣布就調高汽車首次登記稅措施作出兩大讓步，一係豁免宣布加稅前落訂嘅新車，二係相應增加環保車稅務優惠。早排班高官仲實牙實齒話唔會讓步，家陣因乜事忽然認低威嘅呢？

件事係咁嘅，財爺曾俊華嗰個史上最廢財政預算案建議增加汽車首次登記稅，平均加幅十五巴仙。政府話咁做係為咗減少私家車數量，紓緩塞車同污染咁話。點知建議一提出，就引起汽車業界同埋買車人士強烈不滿。講真，業界咁嬲係有道理嘅，通脹高企仲加稅已經好荒謬，政府嘅理由更係不知所謂。正如有議員質疑，咁搞法唔單止達唔到減排嘅目的，仲會令車主放棄買環保新車，令空氣污染惡化。

民意不可侮，立法會各政黨一致反對政府建議，佢哋達成共識，要求喺下列情況下豁免加稅，包括預算案公布前已經落咗訂嘅車、棄舊車換新車，同埋購買環保車。平心而論，呢幾條算合情合理，亦有利環保。如果政府接受建議，咁咪一天都光晒囉，但係班高官唔知係腦囟未生埋定係死要面，一味死撐，卒之愈描愈黑。

比如，人哋建議寬減環保車徵收首次登記稅，運輸及房屋局副局長邱誠武就話，環保車亦有碳排放，對控制車輛有反效果。人哋話，加稅會減慢市民換新車令空氣污染加劇，佢就話咁講「唔科學」。語無倫次，九唔搭八，撩起議員把火，佢哋講到明，如果政府唔修訂，一於唔收貨。班高官咁先識驚，拿拿臨作出讓步。

早知今日，何必當初呢！有人話港府高官犯賤，專門敬酒唔飲飲罰酒，睇嚟講得一啲都冇錯。之不過，政府鋪鋪都自打嘴巴，邊度仲有公信力呀？大佬，等收工都唔使咁吖。叮佢個鎯鎯！