權貴僭建醜聞多 執法不嚴必惹禍

僭建風暴席捲政壇，議員官員一個二個知法犯法，權貴嘅違規醜聞愈揭愈多，香港枉稱法治之區！

呢場僭建風暴由新界西立法會議員張學明揭開序幕，被揭自己及兒子嘅村屋都有僭建物，引起全城關注。其後火燒連環屋，立法會議員陳鑑林、黃容根、梁耀忠、王國興，逐個後欄着火，被傳媒揭發住所有違規建築。議員平日鍾意搶佔道德高地，頭帶光環，今次集體被踢爆知法犯法，唔止有必要拆屋，直頭被人拆招牌。叮！

立法者違法固然諷刺，高官枉法就更加離譜，就喺議員嘅僭建劣行逐一曝光之際，環境局副局長潘潔竟然亦捲入漩渦。潘潔位於大埔汀角路沙欄小築嘅豪華村屋，被本報揭發天台違規僭建面積估計超過二百平方呎嘅玻璃屋！身為問責官員未能奉公守法，有網民直斥潘潔唔識潔身自愛，應該改名叫「潘不潔」，改任「僭建局副局長」，真係鬧得無錯。

咦，咪住，政壇僭建風暴又有新發展喎。議員湯家驊嘅大埔康樂園豪宅被揭車房頂又係加建咗間玻璃屋，花園亦加建咗樓梯同涼亭。嗱，錯就要認，打就企定，潘潔同其他議員被捉個正着都要認衰，頂多扮無知辯稱唔知違法。而湯大狀就例外喎，死撐否認僭建，仲引用一宗自己曾經負責嘅上訴庭案例，話法庭裁定，建於屋內及不涉及結構性嘅改動可獲豁免，毋須入則申請，所以車房加建玻璃屋無問題咁話。

大狀即係大狀，以為靠把口就可以彎嘅都拗番直。不過，有法律界人士就對湯家驊嘅申辯不敢苟同，直指「室內就係室內，天台就係天台」，非經圖則核准嘅加建就屬僭建。更搞笑嘅係，湯家驊引用嘅上訴庭案例，原來早已被終審法院推翻，連自己負責過嘅案件都知啲唔知啲，仲攞嚟狡辯，簡直瘀到爆！而屋宇署更證實，玻璃屋並無事先得到建築事務監督批准，署方會根據《建築物條例》採取適當嘅執法行動。

開講有話：天子犯法，與庶民同罪。無論係官員、議員定係大狀，違法就係違法，唔應該恃住有權有勢就意圖偷雞，妄想含糊其詞蒙混過關。而政府身為執法機關更加要一視同仁嚴拿懲辦，千祈咪縱容放生呀，否則有法等如無法，必然惹禍，全港業主有樣學樣，僭建問題進一步失控，到時港府就真係火燒後欄恨錯難返。叮！