黑心食品殺埋身 港府把關莫等閒

內地黑心食品無奇不有,香港人北上消費分分鐘中招。今時今日,如果問內地有乜食品係有問題嘅,倒不如問吓仲有乜嘢可以食。嗱,孔雀石綠魚、蘇丹紅蛋、滑石粉麵條、地溝油、頭髮豉油、甲醛啤酒、硫磺雪耳、瘦肉精豬肉等一早就臭名遠播,近排又出現染色饅頭、毒炸雞、毒豆芽、福爾馬林鴨紅。

黑心食品害人不淺,早前北京有個歲半大嘅細路女,食咗喺街邊檔攤買嘅炸雞後口吐白沫,送院搶救無效死亡。亞硝酸鹽係一種防腐劑,毒性同砒霜有得揮,成年人食入一克多啲就冇命,檔主居然攞佢嚟處理雞肉,簡直冇人性!叮!

黑心商人為咗賺錢乜都夠膽做,佢哋個良心早就畀狗食咗。難怪有人話,中華民族到咗最缺德嘅時候。

奸商謀財害命固然可惡,但當局姑息養奸亦係罪無可恕。高官明知問題嚴重,但又翹埋雙手乜都唔做,擺明係卸責啫。太一叮忍唔住要問:你哋究竟係管唔到定係唔想管?如果連食品安全咁簡單嘅事都管唔到,又點樣管高層次嘅外交國際大事?如果係唔想管,咁你哋平日口響響講乜嘢以人為本,唔通都係呃神騙鬼?

其實無產階級專政威力無比,無論係艾未未,又或者係趙連海,都可以令佢哋統統失蹤。對炮製黑心食品嘅奸商,點解唔可以照辦煮碗,令佢哋全部失蹤?咁民眾咪有啖好食囉。

有人會話,內地嘅事,香港人都唔理得咁多嘞,不如實際啲搞好本港嘅食物安全先啦。話係咁講,問題係,今時今日香港人嘅食品絕大多數都由內地供應,內地食品出咗事,唔通港人可以獨善其身咩?

大家仲會話:唔係有港府把關咩?冇錯,當局喺口岸設咗唔少檢查站,可惜都形同虛設,例如內地供港蔬菜本來要喺羅湖口岸接受檢查,但檢查人員鋪鋪眼大睇過龍,有人將臘肉收埋喺菜車裏面,佢哋都睇唔到,更遑論問題蔬菜啦。

按道理,內地同香港一早就設立食物安全通報機制,但每逢內地爆出食物安全事故,食物及衞生局局長周一嶽等人都後知後覺,賊過興兵。今次黑心食品殺埋身,若果仲係懶懶閒,恐怕就要食死人!

仲有,有毒食品係個超級計時炸彈,隨時搞到香港一鑊泡,北大人唔係口口聲聲要維護香港經濟繁榮、社會穩定咩?唔該搞掂啲黑心食品先啦,否則,計時炸彈一爆,送乜大禮都冇用。叮!

「Money18免費即秒股票報價網站」現推出8升級功能,財經資訊,實時實發!