規管旅業官有責　無謂再煲冇米粥

好事不出門，壞事傳千里。香港旅遊業醜聞多多，早就臭名遠播。呢，話口未完，又有一批溫州旅客投訴旅行社安排酒店貨不對辦嘞。雖然旅遊業議會實牙實齒話今次並不涉及貨不對辦，已要求旅行社及導遊提交報告，但點講都好，旅遊業耐唔耐就發生糾紛，耐唔耐就有旅客投訴，無論誰是誰非，結果都必定會影響香港聲譽。

好嘞，港府終於識驚，尋日公布檢討旅遊業運作及規管架構諮詢文件。其實，旅遊業亂成咁，都係因為欠缺一個有效嘅監管機制，家陣當局終於肯面對現實，提出改革方案，遲係遲咗啲，但總好過冇到，問題係，呢啲方案究竟可唔可行、合唔合理呢？

正所謂，三個和尚冇水食。本港旅遊業一向各自為政，表面上涉及多個衙門，實際上根本無王管。屬於政府部門嘅旅遊事務署，只管旅遊設施；屬於公營機構嘅旅遊發展局，只負責宣傳推廣；屬於業界組織嘅旅遊業議會，徒有監管之名，而無監管之實，仲慘過無牙老虎。唉，監管機制七國咁亂，旅遊業唔出事至奇！

話時話，今次港府提出乜嘢改革方案呢？嗱，方案總共有四個：一，改革旅遊業議會，包括增加非業界代表數目；二，將旅議會部分規管職能例如處理上訴個案等，轉移畀另設嘅獨立委員會負責；三，成立法定機構取代旅議會，負責監管業界；四，由政府部門完全取代旅議會，自己負起監管責任。

叮！方案雖然有四個咁多，係威係勢，可惜頭三個方案換湯不換藥，講咗等於冇講。係人都知，無論旅議會點樣改革，增加幾多成員，都改變唔到自己人管自己人嘅性質，所以咯喎，繼續由旅議會負責監管，根本解決唔到問題。

講來講去，唯一可行嘅只有第四個方案，即係港府收番監管權。其實，如果唔係港府縮骨，一早就應該自己監管喇，睇吓周邊地區，內地、台灣、澳門，仲有星馬泰等等，邊個唔係由政府監管旅遊業㗎。旅遊業話晒都係香港經濟支柱之一，當局點可以翹埋雙手，闊佬懶理呢？

一句到尾，規管旅遊業，港府責無旁貸。講多無謂，食多會滯，當局無謂再假諮詢煲冇米粥嘞，快快趣趣修改法例，做好呢份工喇。如果再唔嗲唔吊，唔湯唔水，等到旅遊業呢條支柱都冧埋，到時做乜都冇用吖，叮！