增加核電害死人　反核浪潮風雲起

唔講唔知，美國太空總署爆料，全球多達五億人活在核威脅之下，簡直係「核」人聽聞！

日本福島核洩漏災難遠未解除，全球聞核色變，連世界權威美國太空總署都不敢掉以輕心，調查全球二百一十一座核電站，結果發現核災難對人類嘅威脅超出想像。若以核電站方圓三十公里為準則，即等同福島核事故嘅疏散區，全球有九千萬人正身處核威脅範圍之內，當中近年核電站如雨後春筍遍地開花嘅中國佔一成，即九百萬人。

研究更指，若然將範圍擴至方圓七十五公里，全球受核災威脅嘅人數即時大幅上升至五億，附近住有最多居民嘅正正就係與香港一河之隔嘅大亞灣核電站同嶺澳核電站，總共涉及五千六百萬人，當中嘅七百萬同胞，就係香港人。

依家講緊核能災難，一種足以令人類毀滅嘅生態浩劫，唔講得笑㗎，其實唔使美國太空總署提醒，香港人從來未忘記「大核」呢個貼身原子彈。不過正如有人話，香港社會有時幾反智，面對核威脅可能有人會不以為然淡淡一句：「唓，五億算乜嘢，中國感染結核病菌嘅人都唔止五億啦！」邊個咁鐵石心腸？咪係仲死撐要擴大核能供電比例嘅特區高官囉。

喂，香港擴大核能供電比例，意味住未來要增建核能反應堆，形同將七百萬市民向火山口再推近一步喎。高官就算尸位素餐，早已係無靈魂嘅一具具行屍走肉，都無理由搵全港市民陪佢哋冒險。尋日環保團體綠色和平同政黨發起遊行「反核」，佢哋聯手向港府發通牒，要求環境局盡快宣布擱置增加核電計劃。

嗱，遊行人士就講得啱嘞，大核如芒刺在背，一旦出事香港大禍難逃。政府唔去設法節能或者開發新能源，反而擇惡固執向危害性最大嘅核電埋手，根本就係大食懶唔用腦，一味貪方便就手，罔顧市民安全，呢啲官僚作風真係隨時害死人㗎。

遊行人士由兩個一點八米高「反核」巨型木雕「開路」，有人戴上「反核」口罩，寓意無聲抗議；有人戴上恐怖面具，寓意核電凶險，苦心可見，環保團體亦收集到七萬名市民簽名反對輸入核電。唉，反核行動能否令港府擱置增加核電計劃仍屬未知之數，不如高舉鮮明旗幟打倒庸官啦。叮！