租客五十年不變 政府物業太混帳

「大家新年添新禧，賺錢多多笑嘻嘻，買屋買田又買地。」今時今日，試問有乜比買樓置業更開心呀？香港地寸土尺金，有幾層樓揸手，靠收租就可以食過世。如果喺市區有個千零呎嘅舖位，分分鐘好過做打工皇帝。

話說何文田窩打老道火車橋底旁邊有間千呎左右嘅鐵皮屋，以前係士多，依家改咗做會計事務所同埋外傭公司。唔好睇小呢間鐵皮屋呀，喺正市中心，出入方便，業主實係收租收到笑。

可惜呢個業主係不嬲大手大腳嘅香港政府，居然冇公開招租，租客五十年不變，租金幾多就冇人知。正如有區議員話齋，如果公開招租，可以收到更佳嘅租金，但政府官員坐喺辦公室不聞不問，租金收入都闊佬懶理。

有人會話，政府大雞唔食細米啫，政府物業多到數唔清，區區鐵皮屋算乜噃。冇錯，港府係全港最大嘅業主，可惜又係最戇居嘅業主，管理物業混帳出晒名。就講食環署管轄嘅街市，因為條件惡劣，嚇走晒租戶，好多都十室九空。班庸官從來唔諗辦法改善條件，降低空置率，眼白白睇住公帑見財化水。

政府嘅戇居嘢，三日兩夜都講唔完，旺角工業貿易署大樓就最經典。政府八九年購入呢座大廈嘅時候，地庫、閣樓、一樓、二樓都係商場，呢度位處黃金地段，人流密集，商場租金本來幾可觀嘅，點知班官員唔知黐咗邊條筋，夾硬將商場舖位改晒做辦公室，二十年來令庫房少咗十億元租金。大拿拿十億噃，攞嚟扶貧可以幫到幾多窮人呀。你話班官員係咪超級戇居呢？叮！

更搞笑嘅係，尖沙咀加連威老道有間旺舖，一早就被政府充公，但居然有人冒充業主，收咗兩年幾租，地政總署竟然懵然不知。

仲有更騎呢嘅個案，大埔大美督有塊地皮，三十幾年前就由教育當局申請撥出並出資興建活動中心，當時交畀一個體育協會營運，但始終係如假包換嘅官地。奇就奇在，教育當局後來喺呢塊自己嘅地皮擺器材，居然要向體育協會交租，仲交足廿幾年添。難怪申訴專員直斥件事不可思議，荒謬至極。

政府物業管理千瘡百孔，呢度漏一啲，嗰度漏一啲，加加埋埋就係天文數字。物業係阿公嘅，班官先至咁大方啫，如果係佢哋自己嘅，睇怕收少個崩都唔得啦，話佢哋唔係敗家仔，邊個信呀？叮！