孫公帶病上陣　港府腎虧難救

真係邪到你唔信！特區高官重病噩耗未停過，最新消息係今年初先至做過小腸氣手術嘅教育局局長孫明揚腎衰竭，必須不定期進行俗稱「洗肚」嘅腹膜透析治療。

高官嘅身心狀態直接影響決策優劣，孫公年紀大機器壞，爆出隱瞞重病疑雲，尋日急急解畫，公開證實上年十月底已經發現患上腎衰竭，需要接受洗肚治療。根據呢位官場「拆彈專家」解釋，一直帶病履行局長職務，皆因病情穩定，洗肚又喺晚間進行，對工作影響輕微咁話。

拆彈專家為自己拆彈，可信性有幾高，太一叮唔敢妄下論斷，不過有一樣嘢相當肯定，夕陽政府黑氣纏身，多名高官唔係入廠大修，因病辭職，就係長期病患，苦撐吊命，唔通真係夕陽政府氣數將盡？定係「史上最廢」預算案觸發嘅民怨太大，上月驚蟄全城打小人震親港府龍脈，以致官員當殃？

腎虧曾班子，老弱傷病殘。嗱，根據民間經驗坊間常識，腎功能衰竭可大可小o架，孫公就算未至於要佗住部洗腎機同班英皇書院高層傾縮班，一般嚟講，腎病患者精神疲憊，好需要多啲休息，何解孫公唔索性辭官休養，仲要返工搵命博呢？正如醫學界所言，腎衰竭亦會影響血壓，唔可以承受太大壓力，若然再搞多單直資學校「混帳」風暴出嚟，孫公頂唔頂得順o架？

唉，鬼咩，港府人才凋零，高官斷層，前一排商務及經濟發展局局長劉吳惠蘭做完切除結腸癌手術後，以養病為由呈辭，港府到依家都仲未搵到接任人，如果連孫公都走埋，本已十個樽七個蓋嘅管治窘境進一步惡化，曾蔭權梗係三跪九叩都要拜託孫公捱埋呢十四個月餘下任期啦，話晒捱到孫公腎病惡化，都好過自己有麻煩腳痛吖嘛。

話時話，香港人才輩出，港府點會無人可揀吖，只不過係港府施政亂象叢生，民望插水，早就失道寡助，不得民心，加上夕陽政府時日無多，仲邊有人肯蹚渾水接手做短命局長吖。原來，喺香港換局長，比排期等換腎仲要難o架！睇怕孫公都係要頂硬上o架嘞，最多以後喺立法會開開吓會覺得攰咯喎，咪即場大覺瞓囉，橫掂佢都唔係第一次被人影到喺議事堂搵周公o架啦。

一句講晒，港府腎功能已經極度衰竭，施政有心無力，有目共睹，大家根本已經不存厚望，只求苟延殘喘嘅餘下任期施政咪再搞出個大頭佛，添煩添亂，就已經還得神落囉。叮！